Cəfər Cabbarlı adına Respublika Gənclər Kitabxanasında Xalq şairi Fikrət Qocanın 90 illlik yubileyi çərçivəsində hazırlanmış materiallar istifadəçilərə təqdim edilir.
Bu barədə Avropa.info-ya kitabxanadan məlumat verilib.
2025-ci ildə Azərbaycan ədəbiyyatının görkəmli nümayəndəsi, Xalq şairi, Dövlət mükafatı laureatı Fikrət Qocanın anadan olmasının 90 ili tamam olur. Azərbaycan Respublikasının Prezidenti İlham Əliyevin Xalq şairi Fikrət Qocanın 90 illik yubileyinin keçirilməsinə dair imzaladığı Sərəncamdan irəli gələn tədbirləri həyata keçirmək məqsədilə Cəfər Cabbarlı adına Respublika Gənclər Kitabxanasında “Fikrət Qoca – Azərbaycan poeziyasında yeni ovqat” adlı biblioqrafik icmal hazırlanıb.
Təqdim olunan materialda Xalq şairi Fikrət Qocanın 90 illik yubileyinin qeyd edilməsi haqqında Azərbaycan Respublikası Prezidentinin Sərəncamının, akademik Bəkir Nəbiyevin “Şair fərdiyyəti”, yazıçı-publisist Pərvinin “Cildlərə sığmayan şair” adlı məqalələrinin tam mətni, elm, mədəniyyət, ədəbiyyat, mətbuat sahəsinin nümayəndələrinin, ictimai-siyasi xadimlərin onun haqqında söylədikləri dəyərli fikirlər yer alır. Biblioqrafik icmalda Fikrət Qocanın əsərləri, ön söz yazdığı, redaktə və tərtib etdiyi, məsləhətçisi olduğu kitabların, haqqında qələmə alınan nəşrlərin, məqalələrin biblioqrafik icmalı, şairin dövri mətbuatda dərc edilən şeir və yazılarının siyahısı verilir. Kitabxana əməkdaşları tərəfindən hazırlanan icmalda müəllifin müxtəlif illərdə dərc edilən “Seçilmiş əsərləri”, “Hələlik, qiyamətəcən…,” “Taleyin ağır taleyi”, “Ömrümdən anlar”, “Adi həqiqətlər” və haqqında qələmə alınan “Əbədiyyətə qovuşan “Od oğlu””, “Fikrət Qocanın yaradıcılıq yolu”, “Azərbaycan poeziya çələngi” kimi 50-dən çox kitabın qısa annotasiyası və biblioqrafik təsviri təqdim edilir.
“Fikrət Qoca – Azərbaycan poeziyasında yeni ovqat” adlı biblioqrafik icmal kitabxananın rəsmi saytında https://www.ryl.az/funds/biblioqrafik-icmal yerləşdirilib
