İstanbulun Gaziosmanpaşa rayonunda keçirilən mitinq zamanı İstanbul Cümhuriyyət Baş prokuroru Akın Gürlek barəsində səsləndirdiyi fikirlərə görə CHP sədri Özgür Özəl barəsində istintaq başladılıb.
Avropa.info bildirir ki, prokurorluğun yaydığı açıqlamaya görə, Özgür Özəl haqqında “məhkəmə funksiyasını yerinə yetirən şəxsi vəzifəsini icra etməsinə mane olmaq məqsədilə hədələmə” və “ictimai vəzifəli şəxsə vəzifəsindən dolayı açıq-aşkar təhqir” maddələri üzrə istintaq başladılıb.
Mövzu ilə bağlı açıqlama verən Türkiyənin ədliyyə naziri Yılmaz Tunç CHP sədri Özgür Özələ sərt reaksiya göstərib. Nazir bildirib ki, heç kim məhkəmə orqanlarını hədəf ala və təhdid edə bilməz. Onun sözlərinə görə, bu cür açıqlamalar hüquq dövlətinə açıq hücum anlamına gəlir.
“CHP sədrinin davam edən istintaqlara istinad edərək İstanbul Cümhuriyyət Baş prokurorumuzu və digər məhkəmə nümayəndələrini hədəf alan təhdidedici ifadələri əsla qəbul edilə bilməz. Heç kim məhkəmə nümayəndələrini hədəf göstərə və təhdid edərək məhkəməyə yön verə bilməz. Bu məsuliyyətsiz və düşüncəsiz açıqlamalar birbaşa hüquq dövlətini və məhkəmə müstəqilliyini hədəfə alır”, – deyə Yılmaz Tunç qeyd edib.
Nazir əlavə edib ki, Türkiyə Konstitusiyasının 138-ci maddəsinə əsasən, hakim və prokurorlar heç bir şəxs, orqan və ya qurumdan göstəriş almadan, yalnız hüquq və vicdanlarına əsasən vəzifələrini yerinə yetirirlər.
“İstintaqa cəlb olunmuş məsələlərlə bağlı hüquqi müdafiə yolları açıqdır və müvafiq şəxslərin özlərini müdafiə etmək hüquqları var. İddialarla bağlı müdafiə yalnız məhkəmə orqanlarında həyata keçirilə bilər. İstintaq prosesi davam etdiyi halda prokurorluq orqanına qarşı edilən təhdid və təhqirlər hüquq dövləti prinsipləri ilə uyğun gəlmir”, – deyə o əlavə edib.
Nazir bildirib ki, heç kim hüquqdan kənara çıxaraq təhdid və təzyiqlə nəticə əldə edə bilməz:
“Türkiyə məhkəmə sistemi fəaliyyətini müstəqil və qərəzsiz şəkildə davam etdirir. Hakim və prokurorlarımız təhdidlərə boyun əyməyəcək; ədalət tərəzisi yalnız hüquqla işləməyə davam edəcək”.
