Gözlənildiyi kimi, Rusiya ilə Ukrayna nümayəndə heyətlərinin növbəti görüşü konkret olaraq yalnız hərbi əsirlərin dəyişdirilməsi barədə razılaşma ilə nəticələndi. Bəzilərinin ümid etdiyi kimi, atəşkəsin şərtləri və mexanizmi barədə heç bir razılaşma olmadı.
Bu barədə Avropa.info-ya sabiq millət vəkili Qulamhüseyn Əlibəyli Rusiya-Ukrayna danışıqlarının perspektivlərini şərh edərkən bildirib.
O qeyd edib ki, tərəflər atəşkəsin şərtləri barədə barədə hələ görüş başlayana qədər mediaya sızdırılan məlumatları bir növ bir-birlərinə rəsmi təqdim ediblər.
“Əlbəttə, burada təcavüzkar Rusiyanın irəli sürdüyü şərtlər daha ağır və Ukrayna üçün qəbul edilməsi faktiki qeyri-mümkün olan şərtlər idi (bu barədə kifayət qədər məlumat verildiyindən həmin şərtlərin üzərində ətraflı dayanmaq istəməzdim – Q.Ə).
Görüş ərəfəsində tərəflərin qarşılıqlı raket və dron zərbələri, xüsusən də Ukraynanın həyata keçirdiyi əməliyyat cəlbedici görünsə də müharibənin gedişində nəinki əsaslı dönüş yarada bilmədi, hətta danışıqların gedişinə əhəmiyyətli təsir edə bilmədi”, – deyə o əlavə edib.
Bundan başqa, Tramp administrasiyasının Rusiyanın irəli sürdüyü şərtlərin əksəriyyətini haqlı hesab etməsini də qeyd edən Q.Əlibəyli bildirib ki, bu, ümumi nəticəyə təsir göstərən mühüm məqam kimi nəzərdən keçirilə bilər:
“Rusiya bu müharibədə ABŞ-in mövqeyini onun şirnikləndirilməsi kimi qəbul edib daha ağır şərtlər irəli sürür. Amerikanın “New York Times” qəzeti artıq danışıqların iki raundunun döyüş əməliyyatları dayandırılmadan baş tutmasını Putinin taktiki qələbəsi adlandırıb.
Bu ayın sonunda keçirilməsi güman olunan növbəti görüşün də perspektivi dumanlı görünür”.
