Cəfər Cabbarlı adına Respublika Gənclər Kitabxanasında “Xalq yazıçısı Süleyman Rəhimov – 125” adlı elektron məlumat bazası istifadəçilərə təqdim edilib.
Avropa.info xəbər verir ki, bu il Azərbaycan ədəbiyyatının görkəmli nümayəndəsi, nasir və ictimai xadim, Xalq yazıçısı Süleyman Rəhimovun anadan olmasının 125 illiyi tamam olur. Yazıçının 125 illik yubileyi münasibətilə Cəfər Cabbarlı adına Respublika Gənclər Kitabxanasında bir sıra silsilə materiallar ilə yanaşı “Xalq yazıçısı Süleyman Rəhimov – 125” adlı elektron məlumat bazası da hazırlanıb. Elektron məlumat bazası kitabxananın rəsmi saytında https://ryl.az/melumat-bazalari/Suleyman_Rehimov_el_melumat_bazasi/index.html yerləşdirilib. Azərbaycan və rus dillərində hazırlanan bazada yazıçının həyat və fəaliyyətinin əsas tarixləri, bir sıra görkəmli şəxslərinin onun haqqında söylədikləri dəyərli fikirlər, rəsmi sənədlər, layiq görüldüyü orden, mükafat və fəxri adlarla yanaşı, professor Fazil Qaraoğlunun “Tarixdə iz buraxanlar: Süleyman Rəhimov”, AMEA-nın Nizami Gəncəvi adına Ədəbiyyat İnstitutunun XX əsr Azərbaycan ədəbiyyatı şöbəsinin elmi işçisi Ədalət Rəsulovanın “Zamanın hüdudlarını aşan sənətkar”, filologiya üzrə fəlsəfə doktoru, dosent Elnarə Qaragözovanın “Sosrealizm: Azərbaycan modeli – Süleyman Rəhimov” kimi məqalələrinin tam mətni təqdim edilir. Elektron bazada Süleyman Rəhimovun türk, ingilis, rus, bolqar, fransız dilinə tərcümə edilən yaradıcılıq nümunələrinin, dəsrliklərdə, məcmuələrdə, dövri mətbuatda dərc edilmiş bədii əsərlərinin, ədəbi‐tənqidi, publisistik məqalələrinin, məruzələrinin, yazıçı haqqında qələmə alınan kitabların, məcmuələrdə və dərsliklərdə dərc edilən məqalələrin siyahıları yer alır. Kitabxana əməkdaşları tərəfindən hazırlanan bazada “Süleyman Rəhimov bədii ədəbiyyatda və incəsənətdə”, “Dissertasiya və avtoreferatlar”, “İzonəşrlər”, “Filmoqrafiya”“, Foto və videoqalereya” bölmələri, kitablarının virtual sərgisi də təqdim edilir.
