Azərbaycan Respublikasının Qeyri-Hökumət Təşkilatlarına Dövlət Dəstəyi Agentliyinin dəstəyi ilə “Sosial İslahatlara Dəstək” İctimai Birliyi tərəfindən həyata keçirilən “Peşəni seç, gələcəyinin memarı ol” layihəsi çərçivəsində 15 may 2026-cı il tarixində Bakı şəhəri Xəzər rayonu, Binə qəsəbəsində yerləşən Ə.Quliyev adına 121 nömrəli tam orta məktəbdə maarifləndirici görüş keçirilib.
Tədbirdə məktəbin rəhbərliyi, pedaqoji kollektiv, ictimai birliyin nümayəndələri və yeniyetmələr iştirak ediblər.
Tədbiri giriş sözü ilə açan “Sosial İslahatlara Dəstək” İctimai Birliyinin sədri, layihə rəhbəri Namiq İnşallahoğlu layihənin məqsəd və vəzifələri barədə iştirakçılara ətraflı məlumat verib. O bildirib ki, layihənin əsas məqsədi yeniyetmələrin və gənclərin peşə seçimində düzgün istiqamətləndirilməsi, onların əmək bazarının tələblərinə uyğun bilik və bacarıqlarla təmin olunmasına dəstək göstərilməsi, insan kapitalının inkişafına töhfə verilməsi və gələcək karyera hədəflərinin formalaşdırılmasına yardım etməkdir.
Natiq qeyd edib ki, ölkəmizdə həyata keçirilən dövlət gənclər siyasəti çərçivəsində gənclərin peşə hazırlığının gücləndirilməsi, məşğulluq imkanlarının artırılması və əmək bazarına uğurlu inteqrasiyasının təmin olunması mühüm prioritetlərdən biridir. Bu baxımdan həyata keçirilən layihə dövlətin müəyyən etdiyi strateji hədəflərə ictimai dəstək xarakteri daşıyır.
Daha sonra tədbirdə təlimçi qismində çıxış edən AMEA-nın fəlsəfə doktoru Qədim Qubadov peşə seçiminin insan həyatında verilən ən mühüm qərarlardan biri olduğunu vurğulayıb. O qeyd edib ki, hər bir insanın gələcək həyat yolunun, məqsədlərinin və uğurlarının müəyyənləşməsində peşə seçimi xüsusi rol oynayır.
Qədim Qubadov bildirib ki, peşə yalnız gəlir əldə etmək vasitəsi deyil, eyni zamanda insanın özünü ifadə etməsi, potensialını reallaşdırması və cəmiyyətə fayda verməsi üçün vacib platformadır. Onun sözlərinə görə, bir çox gənclər peşə seçərkən ətraf mühitin təsiri, peşələrin populyarlığı və ya prestiji əsasında qərar verməyə çalışırlar. Lakin uğurlu karyera qurmaq üçün ilk növbədə insan öz maraq və bacarıqlarını düzgün müəyyən etməlidir.
Təlimçi çıxışında vurğulayıb ki, bəzi insanlar həyatlarında yalnız bir seçim etmək istədikləri üçün bu qərarı verərkən ailələrinin təcrübəsinə, ətrafdakı insanların fikirlərinə və ya peşələrin nüfuzuna üstünlük verirlər. Halbuki əsas məsələ insanın gələcəkdə özünü harada görməsi, hansı fəaliyyət sahəsindən zövq alması və hansı istiqamətdə inkişaf etmək istəməsidir.
Qədim Qubadov gənclərə müraciət edərək bildirib ki, “Mən haradayam?”, “Nəyə qadirəm?”, “Gələcəkdə özümü hansı sahədə görürəm?”, “Hansı fəaliyyət mənə daha çox motivasiya verir?” kimi sualların cavabını tapmaq düzgün peşə seçiminin əsasını təşkil edir. O qeyd edib ki, bu suallar insanı özünü dərk etməyə, daxili potensialını üzə çıxarmağa və gələcək həyatını daha düzgün planlaşdırmağa istiqamətləndirir.
Tədbir çərçivəsində iştirakçılara gələcəyin peşələri, əmək bazarında daha çox tələb olunan ixtisaslar, rəqəmsal bacarıqların əhəmiyyəti, şəxsi inkişaf, motivasiya, uğurlu karyera quruculuğunun əsas prinsipləri və düzgün peşə planlaması mövzularında ətraflı məlumat verilib. Görüş interaktiv formatda davam edib, iştirakçıları maraqlandıran suallar cavablandırılıb və onlara praktiki tövsiyələr təqdim olunub.
Layihə Azərbaycan Respublikasının Prezidenti cənab İlham Əliyevin rəhbərliyi ilə həyata keçirilən dövlət gənclər siyasətinin prioritet istiqamətlərinə, insan kapitalının inkişafı, məşğulluğun artırılması, peşə təhsilinin təşviqi və gənclərin əmək bazarına inteqrasiyası sahəsində müəyyən edilmiş dövlət proqramlarının məqsəd və vəzifələrinə uyğun olaraq icra olunur. Bildirilib ki, bu kimi təşəbbüslər gənclərin əmək bazarına daha hazırlıqlı daxil olmasına, peşə bacarıqlarının inkişafına, sosial fəallığının və özünəinamının artmasına mühüm töhfə verir.
Tədbirin ikinci hissəsində sertifikat təqdimatı mərasimi keçirilib. Mərasim zamanı fəlsəfə doktoru, təlimçi Qədim Qubadov peşə seçimi, şəxsi inkişaf və karyera planlaması mövzularında hazırlanmış inşa materiallarının əhəmiyyətindən bəhs edib. Daha sonra layihə çərçivəsində fəal iştirak edən yeniyetmələrə sertifikatlar təqdim olunub.
Məktəb direktoru Zaur Yusifov çıxış edərək bu cür maarifləndirici layihələrin şagirdlərin öz maraq və bacarıqlarını daha yaxından tanımasına, gələcək peşə və karyera hədəflərini düzgün müəyyənləşdirməsinə mühüm dəstək verdiyini vurğulayıb. Eyni zamanda layihənin həyata keçirilməsinə göstərilən dəstəyə görə Azərbaycan Respublikasının Qeyri-Hökumət Təşkilatlarına Dövlət Dəstəyi Agentliyinə və “Sosial İslahatlara Dəstək” İctimai Birliyinə təşəkkür ifadə olunub.
Sonda iştirakçılarla xatirə şəkilləri çəkdirildi.
