“Biz bu gün burada 2026‑cı il dövlət büdcəsinin müzakirəsi çərçivəsində yalnız rəqəmlər və cədvəllərlə deyil, strateji vəzifələrlə və Azərbaycanın dünya səhnəsində mövqeyinin güclənməsi ilə bağlı dərin siyasi‑iqtisadi təhlillə çıxış edirik. Bizim bu büdcə layihəsi sadəcə xərclərin və gəlirlərin planlaşdırılması deyil, həm də milli iradənin, dövlətin gücünün və beynəlxalq arena ilə ahəngin ifadəsidir”.
Avropa.info xəbər verir ki, bunu Milli Məclisin Gənclər və idman komitəsinin sədri Şahin İsmayılov parlamentdə 2026-cı il büdcə zərfinin müzakirəsi zamanı deyib.
Komitə sədri bildirib ki, 2026‑cı il üçün hazırlanan dövlət büdcəsi, dünya iqtisadi‑geosiyasi şərtlərinin təlatümlü olduğu bir dönəmdə Azərbaycanda sabitliyi və inkişafı təmin etmək məqsədilə hazırlanmışdır. “Bu, yalnız “rəqəmlərin artımı” demək deyil, eyni zamanda Azərbaycanın özünü güclü dövlət kimi təsdiq etməsi deməkdir.
Büdcənin tərtibatı sübut edir ki, dövlət yalnız bu gün üçün deyil, sabah üçün iqtisadi modelin transformasiyası, qeyri‑neft sektorunun artımı və sağlam sosial infrastrukturların yaradılması strategiyası istiqamətində olan qurur.
Təəssüf ki, bu strateji proqramlar bəzən yersiz tənqidlərə və yanlış şərhlərə məruz qalır. Müxalif və pozucu qüvvələr “büdcədə xaos var” kimi iddialarla cəmiyyətdə yanlış təəssürat yaratmağa çalışırlar.
Lakin belə iddialar pafosa deyil faktlarla və dəqiq iqtisadi şərhlərə əsaslanmalıdır.
Bu baxımdan dövlət büdcəsini təkcə xərclər kimi görmək doğru deyil, həm də gələcəyin investisiyasıdır”, – deputat vurğulayıb.
O əlavə edib ki, büdcənin əsas məqsədləri arasında regionların bərpası, gənclərin təhsilə çıxışı, innovasiya mərkəzlərinin yaradılması, və eyni zamanda Azərbaycanın beynəlxalq aktor kimi yerinin daha da güclənməsi yer alır:
“İqtisadi qəbildə “büdcə” sözü soyuq görünə bilər, lakin bu kontekstdə “büdcə” sözü dövlətin azadlıq və güc doktrinasıdır. Bu doktrina isə yalnız planlaşdırma ilə deyil, eyni zamanda həyata keçirilmiş layihələrlə, beynəlxalq əməkdaşlıqlarla, dövlət institutlarının səmərəli fəaliyyəti ilə təzahür edir.
Siyasi arena populizmə yox, məsuliyyətə və faktrlara əsaslanmalıdır. Elm sahəsində, mədəni sahədə, sosial siyasətdə qabağa doğru addımlar atmaq üçün bizə birlik və fikri azadlıq lazımdır.
2026‑cı il dövlət büdcəsi sadəcə rəqəmlər toplusu deyil — bu Azərbaycanın siyasətinin ifadəsi, gələcək nəsillərə verilən vəd, beynəlxalq arenada mövqeyimizin möhkəmlənməsi üçün maliyyə əsasdır. Biz birlikdə bu vədi gerçəkləşdirməliyik”.
