“Miqrant Uşaqlara Dəstək” İctimai Birliyi layihə çərçivəsində maarifləndirici tədbir həyata keçirib.
Avropa.info xəbər verir ki, Qeyri-Hökumət Təşkilatlarına Dövlət Dəstəyi Agentliyinin maliyyə dəstəyi ilə avqustun 3-də miqrant uşaqların cəmiyyətə inteqrasiyasına dəstək məqsədilə Qaradağ rayonu, Qobustan qəsəbəsinə ekskursiya təşkil olunub.
Ekskursiya zamanı təlimçi Gülyaz Əsgərova Qobustan qayalarında insanların min illər əvvəl yaşadığını uşaqlara çatdırıb. Daha sonra o, Qobustan Muzeyində nümayiş etdirilən eksponatların tarixi haqqında ətraflı məlumat verib. G. Əsgərova bildirib ki, sərgilənən eksponatların əksəriyyəti qədim insanların istifadə etdiyi məişət alətləridir. O, bu alətlərin hansı məqsədlə istifadə olunduğunu izah edərək uşaqlarda aydın təsəvvür formalaşdırıb.
Ekskursiyanın ikinci mərhələsində G. Əsgərova qayaüstü rəsmlərin mənaları barədə məlumat verib. Əcdadlarımızın bu rəsmlərlə bizə hansı mesajları çatdırmaq istədiklərini izah edib. O, açıq səma altında sərgilənən bir neçə qaval daşını nümayiş etdirərək qədim insanların uğurlu ovlardan sonra həmin daşlardan musiqi aləti kimi istifadə etdiklərini qeyd edib. Həmçinin o, qədim insanların su toplamaq, ocaq qalamaq üçün çaxmaq daşından necə istifadə etdiklərini də uşaqlara çatdıraraq Azərbaycan tarixinin minilliklərə dayandığını vurğulayıb.
Uşaqların marağına səbəb olan qayaüstü rəsmlərin yanında onlar üçün şəkillər çəkilib.
Qeyd edək ki, G. Əsgərova öz fikirlərini həm Azərbaycan, həm də ingilis dillərində səsləndirib.
Ekskursiyadan sonra uşaqlar üçün nahar süfrəsi təşkil olunub. Nahar zamanı Azərbaycan mətbəxinə məxsus təamlar və müxtəlif şirin içkilər təqdim edilib.
Avropa.info
