İordaniya ordusu ölkə ərazisinin İrandan gələn ballistik raket hücumuna məruz qaldığını, hava hücumundan müdafiə sistemlərinin 18 raketi məhv etdiyini, 2 raketin isə boş ərazilərə düşdüyünü bildirib.
Avropa.info xəbər verir ki, İordaniyanın rəsmi xəbər agentliyi PETRA-nın xəbərinə görə, İordaniya Silahlı Qüvvələrinin rəsmi sözçüsü məsələ ilə bağlı yazılı açıqlama verib.
Açıqlamada hava hücumundan müdafiə sistemlərinin ölkə ərazisini hədəfə alan 20 ballistik raketdən 18-ni müvəffəqiyyətlə bloklayaraq məhv etdiyi, 2 raketin isə yaşayış məntəqələrindən uzaqda olan boş ərazilərə düşdüyü bildirilib.
Açıqlamada hücumda can itkisinin olmadığı, ekspert qruplarının raket qalıqları və qəlpələrin düşdüyü ərazilərin təhlükəsizliyini təmin etmək üçün işə başladığı bildirilib.
Bəyanatda vətəndaşlardan təhlükəsizlikləri üçün şübhəli obyektlərə yaxınlaşmamaq və onlara toxunmamaq və vəziyyət barədə dərhal aidiyyəti qurumlara məlumat vermələri xahiş edilib, informasiya çirklənməsinin qarşısını almaq üçün rəsmi qurumların açıqlamalarından başqa yalan xəbərlərə etibar etməməyə çağırılıb.
Açıqlamada İordaniya Silahlı Qüvvələrinin “ölkənin təhlükəsizliyini və hava məkanının suverenliyini” qorumaq üçün bütün radar, erkən xəbərdarlıq və hava hücumundan müdafiə sistemləri ilə vəzifəsini ən yüksək hazırlıq səviyyəsində davam etdirdiyi vurğulanıb.
İran İnqilab Keşikçiləri Ordusu da bu yaxınlarda İordaniyadakı ABŞ hərbi bazasını ballistik raketlərlə hədəfə aldığını açıqlayıb.
Bəyanatda ABŞ-a qarşı cavab hücumlarının təcavüzlər dayanana qədər davam edəcəyi vurğulanıb.
