Cəmiyyətdə qanuna əsaslanan normal siyasi mühitin və siyasi münasibətlər sisteminin formalaşdırılmasi prosesində dövlətlə siyasi partiyalar arasında dialoqun əhəmiyyəti əvəzsiz, alternativi olmayan məsələlərdən biridir. Belə ki, siyasi partiyalar, ayrı-ayrı şəxslərin və şəxslər qrupunun, sosial təbəqələrin müxtəlif fərdi və korporativ maraqlarını ümumi siyasi maraqlara çevirməklə cəmiyyətlə dövlət arasında bir növ əlaqələndirici vəsilə kimi çıxış edir.
Bunu Avropa.info-ya açıqlamasında politoloq Qulamhüseyn Əlibəyli deyib.
Onun sözlərinə görə, siyasi dialoq mühiti iqtidar – müxalifət qarşıdurmasının siyasi partiyalarla dövlət orqanları arasında konstruktiv əməkdaşlıqla əvəz olunmasına şərait yaradır, milli maraqların və milli birliyin qorunması naminə ölkənin bütün siyasi qüvvələrinin səfərbər olmasına kömək edir:
“Bütövlükdə siyasi partiyalarla dövlət arasında dialoq mühitinin və konstruktiv əməkdaşlığın formalaşdırılması, ümummilli məsələlərdə birliyin və həmrəyliyin olması cəmiyyətin və dövlətin inkişafını şərtləndirən əsas amillərdən hesab olunur.
Siyasi dialoqlar vasitəsilə dövlət orqanları cəmiyyət və dövlət üçün əhəmiyyət kəsb edən aktual məsələlərə dair siyasi partiyaların, müxtəlif qrupların və təbəqələrin mövqelərini, onları narahat edən məqamları birbaşa öyrənir, narahatlıq doğuran məsələlərə dair təklifləri ümumiləşdirmək və lazım gələrsə həmin sahələr üzrə həyata keçirilən siyasətdə operativ dəqiqləşdirmələr etmək imkanı əldə edirlər.
Bu baxımdan son bir neçə ildə Prezident Administrasiyasının Siyasi partiyalar və qanunvericilik hakimiyyəti ilə əlaqələr şöbəsinin həyata keçirdiyi tədbirlərin əhəmiyyətini xüsusi qeyd etmək olar. Bu tədbirlər cəmiyyətdə siyasi müstəvidə yeni münasibətlər sisteminin formalaşmasına, ümummilli məsələlərdə xalq – dövlət – siyasi partiyalar birliyinin və milli həmrəyliyin yaranmasına gətirib çıxardı. 44 günlük Vətən müharibəsi və bir günlük antiterror əməliyyatı zamanı milli birlik və həmrəyliyin ən yüksək nöqtəsi oldu və bizim ümummilli məsələlərdə birgə olmağımızın, vahid mövqedən çıxış etməyimizin əyani nümayişi oldu.
Fevralın 25-də Prezident Administrasiyasının Siyasi partiyalar və qanunvericilik hakimiyyəti ilə əlaqələr şöbəsi tərəfindən “Suverenliyin bərpası: siyasi müstəvidə yeni münasibətlər sisteminin formalaşdırılması” mövzusunda təşkil edilən Dəyirmi Masa milli birlik və həmrəyliyin daha da inkişaf etdirilməsi və möhkəmləndirilməsi istiqamətində həyata keçirilən növbəti əhəmiyyətli tədbirdir. Və hesab edirəm ki, bu tədbir də yeni siyasi münasibətlər sisteminin daha da möhkəmlənməsinə kömək edəcək”.
