“Ot kökü üstündə bitər” demişdir atalarımız və heç vaxt yanılmamışlar.
Bu sözlər tam mənasında Azərbaycan Respublikasının Prezidenti, Ali Baş Komandan İlham Əliyevə aiddir. Müasir müstəqil Azərbaycan dövlətinin qurucusu ümummilli liderimiz Heydər Əliyevin vaxtilə özünə xas müdriklik və uzaqgörənliklə dediyi “Mən ona özüm qədər inanıram və gələcəyinə böyük ümidlər bəsləyirəm” sözlərinin mütəmadi olaraq özünü təsdiqləməsinin şahidi oluruq.
Bunu Avropa.info-ya açıqlamasında Milli Məclisin deputatı Ülviyyə Ağayeva deyib.
Deputat bildirib ki, Ulu öndərimiz Heydər Əliyevin layiqli davamçısı müstəqil Azərbaycan Respublikasının Prezidenti İlham Əliyevin hakimiyyətə gəldiyi gündən xalqımızı tərəqqilərə doğru inamlı addımlarla irəli apardığının şahidi olsaq da xalqın böyük bir dərdi vardı: Qarabağ. Bu da inkişaf və tərəqqimizi sanki yarımçıq edirdi. Demokratik əsaslara söykənən hər bir sivil dövlətdə olduğu kimi, təbii ki, Azərbaycanda da müxalifət də var idi, etiraz edənlər də, həmişə razı qalmayanlar da. Ancaq bu gün hər bir şey dəyişmişdir. Bu gün hamı bir şəxsiyyətin ardınca könüllü gedir.
Tarixin müxtəlif dönəmlərində hər bir xalqın öz kumiri, titullarsız milli qəhrəmanı olur. Bir dövləti idarə etmək, ona yüksək nüfuz qazandırmaq üçün onun lideri olmalıdır. Möhkəm təməl, xalqının, dövlətinin bu günü, gələcəyi üçün düşünən, sözü və əməlləri üst-üstə düşən liderinin olması böyük xoşbəxtlikdir.
Artıq Azərbaycan xalqının belə bir qəhrəmanı, sevimli və hər sözü ehtiramla qarşılanan bir kumiri var. Azərbaycan xalqı Ali Baş komandanın – Prezidentinin ətrafında, həqiqətən, bir yumruq kimi birləşmişdir. Bu, hamıya nəsib olan qismət deyil. Bu taleni İlham Əliyev özü, öz əməlləri ilə yazdı və sözsüz ki, yeni tariximizin də müəllifi oldu. Tarixdə ən güclü ordular öz sərkərdələri ilə tarixə düşüb. İlham .Əliyevin də adı Azərbaycan tarixinə qızıl hərflərlə yazılacaq. 200 il ərzində Azərbaycan torpaqları hissə-hissə, gah məkr və siyasətlə, gah zorakılıq və təzyiqlə əlindən alınmışdır. O isə otuz il düşmən tapdağı altında qalmış topraqlarımızı özümüzə qaytardı: təbii ki, igid Vətən oğullarına arxalanmaqla – o özü də hər dəfə bunu xüsusi vurğulayır. Şəhidlərimizin qanı yerdə qalmadı. Bü gün 30 ilə yaxın bir müddətdə güclü dövlətlərin bəlkə gücsüz hesab etdiyi, ümidini yalnız kağız üzərində qalan qətnamələrə bağlamış Azərbaycan xalqı İlham Əliyevin rəhbərliyi, müdrik siyasəti sayəsində az qala bütün dövlətlərə qarşı sinə gərdi, lazım gəldikdə döyüşə bildiyini, həqiqətən, igid, qorxmaz türk oğlu olduğunu sübut etdi, öz sözünü dedi, mötəbər təşkilatların yerinə yetirə bilmədikləri qətnamələri təkbaşına həyata keçirdi, xalqını illərdir ki, həsrətində olduğu bir zirvəyə – Şuşaya qovuşdurdu”.
O əlavə edib ki, hər bir xalqın özünə layiq rəhbəri olur. Bü gün müstəqil Azərbaycan Respublikasına qlobal düşüncə qabiliyyətinə malik olan, yüksək səviyyəli diplomat, öz dövrünü qabaqlamış siyasətçi, sözü və əməlləri üst-üstə düşən bir şəxsiyyət rəhbərlik edir, bütün dünya liderləri və bizim siyasi rəqiblərimiz bunu etiraf etməyə bilməzlər. O, Azərbaycan xalqının simasıdır, hamının qürur mənbəyidir.
Bu günkü Azərbaycan ulu öndərimiz Heydər Əliyevin xalqın birliyinə əsaslanan, zirvələrdə görmək istədiyi Azərbaycandır.
Avropa.info
