“Artıq bir neçə ildir ki, Prezident Administrasiyasının təşəbbüsü ilə millət vəkilləri, siyasi partiya sədrləri, müstəqil siyasətçilər, kütləvi informasiya vasitələrinin rəhbərləri və media nümayəndələri birlikdə işğaldan azad olunmuş ərazilərimizə səfərlərə gedirlər”.
Bu sözləri Milli Məclisin sabiq deputatı, hüquqşünas Qulamhüseyn Əlibəyli Avropa.info-ya bildirib.
O qeyd edib ki, bu səfərlərin əhəmiyyəti danılmazdır:
“Belə ki, bu səfərlər zamanı işğaldan azad olunmuş ərazilərdə bərpa və yenidənqurma işlərinin gedişi ilə yerində tanış oluruq. Nəzərə almaq lazımdır ki, millət vəkilləri, siyasi partiyalar, müstəqil siyasətçilər və media nümayəndələri dövlətin siyasi həyatında iştirak edən subyektlərdir. Ona görə də bu subyektlərin nəhəng bərpa və quruculiq içləri ilə, işğaldan azad olunmuş ərazilərimizə böyük qayıdış prosesi ilə bilavasitə yerində tanış olmaları böyük əhəmiyyətə malikdir. Sonuncu birgə səfər Cəbrayıl və Zəngilan payonlarına oldu. Millət vəkilləri, siyasi partiya sədrləri, müstəqil siyasətçilər, kütləvi informasiya vasitələrinin rəhbərləri və media nümayəndələri həmin rayonlarda aparılan abadlaşdırma və yenidənqurma işləri ilə tanış oldular. Artıq Cəbrayılda bir sıra yaşayış massivləri istifadəyə verilib və yerli əhalinin bir hissəsi oraya köçürülərək məskunlaşdırılıb. Cəbrayılda yerli sakinlərlə də görüşdük. Cəbrayıldan qaçqın düşmüş bəzi tanıdığım şəxslərlə, Cəbrayılın özünümüdafiəsində qəhrəmancasına iştirak etmiş əqidədaşım Vaqif Əlisoyla görüşdüm. Məskunlaşmış səxslərin məşğulluq problemlərinin həlli və yaşayış üçün zəruri olan infrastrukturların yaradılması ilə bağlı işlər də uğurla həyata keçirilir.
Həmçinin, Zəngilanda da şəhər məscidi, Konqres Mərkəzi, 104 mənzilli yaşayış kompleksi və Oxçuçay üzərində yerləşən su-elektrik stansiyası ilə tanış olduq”.
Q.Əlibəyli əlavə edib ki, təxminən 30 il ərzində həmin ərazilər ermənilərin işğalı altında idi.
“Ərazilərimiz, yaşayış məntəqələrimiz, bütün infrastrukturlar dağıdılıb məhv edilmişdi. Ona görə də bu gün gördüklərimiz çox möhtəşəm və qürurvericidir. Ümumiyyətlə, bu cür səfərlər dövlətlə siyasi partiyalar və media arasındakı münasibətlərin daha da sağlamlaşmasına və inkişafına kömək edir. Əslində, dövlətlə siyasi partiyalar və media arasındakı münasibətlər daha da inkişaf edir. Bu baxımdan, qeyri-rəsmi atmosferin yaranması çox böyük əhəmiyyət kəsb edir. Birgə səfərlərin təşkil olunması və qeyri-rəsmi atmosferin yaradılması gələcəkdə bu münasibətlərin daha da inkişaf etməsinə səbəb ola bilər”, – deyə o, fikirlərini yekunlaşdırıb.
