Qətər və İordaniya İsrailin atəşkəs razılaşmasını pozmasını və Qəzza zolağına humanitar yardımı dayandırmasını pisləyib.
Avropa.info-nun məlumatına görə Qətər Xarici İşlər Nazirliyi verdiyi açıqlamada İsrailin Qəzzaya humanitar yardımı əngəlləməsinin atəşkəs razılaşmasını pozduğunu və beynəlxalq humanitar hüquqa və bütün dinlərin təlimlərinə zidd olduğunu vurğulayıb.
“Qətər dövləti mülki əhalini aclıqdan öldürmək üçün ərzaqdan müharibə silahı kimi istifadə edilməsini rədd edir ”. Bəyanatda beynəlxalq ictimaiyyətə humanitar yardımın Qəzza zolağının bütün bölgələrinə çatmasını təmin etməyə çağırılıb.
Bəyanatda Qətərin Fələstin davasını dəstəkləyən mövqeyinin dəyişməz olaraq qaldığı qeyd edilib.
İordaniya Xarici İşlər Nazirliyindən verilən yazılı açıqlamada, Təl-Əvivin verdiyi qərarın beynəlxalq hüquqa zidd olduğu xatırladılıb və sözügedən qərarın müharibədə mülki şəxslərin qorunmasını nəzərdə tutan Cenevrə Konvensiyasına da zidd olduğu qeyd edilib.
Bəyanatda atəşkəs razılaşmasını açıq şəkildə pozan bu qərarın Qəzza zolağında da hiddətə səbəb ola biləcəyi və İsrailin mübarək Ramazan ayında tətbiq etdiyi blokada ilə fələstinlilərə qarşı aclıqdan silah kimi istifadəni dayandırması ilə bağlı xəbərdarlıq edilib.
Bəyanatda beynəlxalq ictimaiyyətin öz mənəvi və hüquqi məsuliyyətlərini yerinə yetirməli və İsraili Qəzzada atəşkəsə əməl etməyə məcbur etməli olduğu vurğulanıb və humanitar yardımların daxil olmasına imkan verən sərhəd qapılarının açılması və humanitar fəlakətin qarşısının alınması çağırışı edilib.
İsrailin baş nazirlik ofisi dünən baş nazir Benyamin Netanyahunun Qəzza zolağına bütün humanitar yardımların daxil olmasını dayandırmaq qərarına gəldiyini açıqlayıb.
Humanitar yardımın dayandırılması razılaşmanın birinci mərhələsinin başa çatması və İsrailin qəbul etdiyi danışıqların davam etdirilməsi ilə bağlı ABŞ prezidenti Donald Trampın Yaxın Şərq üzrə xüsusi nümayəndəsi Stiv Vitkoffun layihəsini HƏMAS-ın qəbul etməməsi ilə əsaslandırılıb.
İsrail məhbuslar azad edilənə qədər atəşkəs rejimini davam etdirməyəcəyi ilə hədələyib.
HƏMAS isə İsrailin Qəzza zolağına humanitar yardımı dayandırmaq qərarına sərt reaksiya verib və bunun hərbi cinayət olduğunu və atəşkəs razılaşmasına açıq bir zərbə olduğunu bildirib .
Əsir mübadiləsi və atəşkəs müqaviləsi
Yanvarın 19-da Qəzza zolağında imzalanan atəşkəs razılaşması çərçivəsində Həmas və İsrail arasında əsir mübadiləsi və atəşkəs razılaşdırılıb. ABŞ-ın dəstəyi ilə Misir və Qətərin vasitəçiliyi ilə imzalanan saziş hər biri 42 gün davam edən üç fazalı planı ehtiva edir.
HƏMAS ilə atəşkəs və əsir mübadiləsi razılaşmasına baxmayaraq, İsrail Qəzzada atəşkəs rejimini dəfələrlə pozub.
