Prezident İlham Əliyevin Azərbaycana rəhbərlik etdiyi 22 illik dövr müasir dövlətçilik tariximizdə keyfiyyətcə yeni mərhələ kimi xarakterizə olunur. Bu dövr yalnız zaman baxımından deyil, məzmun və nəticələr etibarilə də ölkənin taleyini dəyişən, strateji dönüşlərə imza atılan bir mərhələdir. İlham Əliyevin liderliyi altında Azərbaycan sürətli və davamlı inkişaf modelini formalaşdıraraq regional aktordan qlobal siyasi proseslərdə söz sahibi olan dövlətə çevrilib.
İlk növbədə qeyd edilməlidir ki, bu 22 il ərzində ölkədə davamlı uğurların institusional əsasları qurulub. İqtisadi müstəqillik, enerji təhlükəsizliyi, güclü maliyyə ehtiyatları və modern infrastruktur ölkənin uzunmüddətli inkişaf strategiyasının təməl sütunlarını təşkil edir. Neft-qaz gəlirlərinin rasional idarə olunması, iqtisadiyyatın şaxələndirilməsi və qeyri-neft sektorunun inkişafı Prezident İlham Əliyevin strateji baxışının real nəticələridir.
İlham Əliyevin liderliyinin ən mühüm xüsusiyyətlərindən biri mürəkkəb və ziddiyyətli geosiyasi prosesləri Azərbaycanın milli maraqları prizmasından idarə etməyi bacarmasıdır. Qlobal böhranlar, regional qarşıdurmalar və beynəlxalq sistemdəki qeyri-sabitlik fonunda Azərbaycan balanslı, praqmatik və müstəqil xarici siyasət kursu yürüdərək öz mövqelərini möhkəmləndirib. Bu siyasət nəticəsində ölkəmiz beynəlxalq münasibətlər sistemində etibarlı tərəfdaş və ciddi oyunçu statusu qazanıb.
Prezident İlham Əliyevin tarixi missiyalarından biri məğlub vəziyyətə salınmış bir ölkəni qalib dövlətə və xalqa çevirmək oldu. İkinci Qarabağ müharibəsində əldə olunan möhtəşəm Qələbə təkcə hərbi uğur deyil, illərlə aparılan düşünülmüş siyasətin, güclü dövlət quruculuğunun və liderin qətiyyətli iradəsinin nəticəsi idi. Bu Qələbə regionda yeni siyasi-hərbi reallıqlar yaratdı və Azərbaycanın söz sahibi olduğu yeni təhlükəsizlik arxitekturasının əsasını qoydu.
Bu gün Prezident İlham Əliyev yalnız ölkə daxilində deyil, beynəlxalq miqyasda da böyük nüfuza malik lider kimi qəbul olunur. Onun çıxışları, təşəbbüsləri və mövqeləri qlobal platformalarda diqqətlə izlənir, beynəlxalq aktorlar tərəfindən ciddi şəkildə nəzərə alınır. Azərbaycan artıq proseslərin obyektinə deyil, subyektinə çevrilib.
Yeni reallıqlar yaratmaq bacarığı İlham Əliyevin siyasi liderliyinin əsas xüsusiyyətlərindəndir. Postmünaqişə dövründə bölgədə sülh gündəliyinin formalaşdırılması, regional əməkdaşlıq təşəbbüsləri və nəqliyyat-kommunikasiya layihələri Azərbaycanın gələcək onilliklər üçün strateji rolunu müəyyənləşdirir. Qlobal miqyasda mürəkkəb geosiyasi proseslər fonunda Prezident İlham Əliyev böhranları fürsətə çevirməyi bacaran lider kimi çıxış edir.
Bütün bu reallıqlar onu göstərir ki, Azərbaycanın gələcəyi Prezident İlham Əliyevin müəyyənləşdirdiyi inkişaf strategiyası ilə birbaşa bağlıdır. Bu strategiya güclü dövlət, qalib xalq, dayanıqlı sülh və davamlı iqtisadi inkişaf prinsiplərinə əsaslanır. Şübhəsiz ki, bundan sonra da İlham Əliyevin liderliyi altında Azərbaycan yeni uğurlara imza atacaq, milli maraqlarını qlobal miqyasda qorumaq və möhkəmləndirmək istiqamətində irəliləməyə davam edəcək.
Azərbaycanın gələcəyi düşünülmüş strategiya, qətiyyətli liderlik və milli həmrəyliyin vəhdətində formalaşır. Bu yol isə artıq müəyyən edilib və dönməz xarakter alıb.
Müşfiq Məmmədli,
Milli Məclisin deputatı
