Belarus Prezidenti Aleksandr Lukaşenkonun kiçik oğlu Nikolay Lukaşenko hərbi xidmətə başlayıb.
Avropa.info xəbər verir ki, onun xidmət etdiyi hərbi hissənin yeri açıqlanmır. Bunu Aleksandr Lukaşenko özü bildirib.
“Orduda lazım olduğu kimi, hamı kimi xidmət edir. Leytenantdır. Harada olduğunu deməyəcəyəm, amma ən çətin bölmədədir”, – deyə Lukaşenko deyib.
Nikolay Lukaşenko 31 avqust 2004-cü ildə anadan olub. 2022-ci ildə məktəbi qızıl medalla bitirib. Daha sonra biotexnologiya istiqamətində ali təhsil alıb. Belarus Dövlət Universiteti ilə Pekin Universitetinin birgə biotexnologiya proqramında təhsil alan Nikolay 2026-cı ilin iyununda Pekin Universitetində diplomunu alıb. Hazırda 22 yaşı var.
Atasının sözlərinə görə, Nikolay hərbi xidmətdə olmasına baxmayaraq, boş vaxtlarında biotexnologiya sahəsində çalışmalarını davam etdirir. Onun leytenant rütbəsində xidmət etdiyi bildirilir, lakin hansı hərbi hissədə olduğu açıqlanmır. Lukaşenko yalnız oğlunun “ən çətin bölmədə” xidmət etdiyini deyib.
Aleksandr Lukaşenkonun özünün prezidentliyə gedən yolu da maraqlı olub. O, sovet ordusunda xidmət etdikdən sonra təsərrüfat sahəsinə keçib. 1982-ci ildə kolxoz sədrinin müavini işləyib, sonrakı illərdə müxtəlif rəhbər vəzifələr tutub. 1987-ci ildə “Qorodets” sovxozunun direktoru təyin edilib.
1990-cı ildə Lukaşenko Belarus Ali Sovetinin deputatı seçilib. Parlamentdə hökuməti sərt tənqid etməsi və korrupsiyaya qarşı mübarizə məsələlərini önə çıxarması onun ölkə miqyasında tanınmasına səbəb olub. 1993–1994-cü illərdə parlamentin korrupsiyaya qarşı mübarizə üzrə müvəqqəti komissiyasına rəhbərlik edib.
1994-cü ildə keçirilən ilk Belarus prezident seçkisində namizədliyini irəli sürən Lukaşenko qalib gələrək ölkə prezidenti olub.
Belarus lideri bundan əvvəl ölkədə ordunun döyüş hazırlığının yoxlanılacağını açıqlayaraq, “Müharibə olmaması üçün müharibəyə hazırlaşırıq”, – deyə bildirmişdi
