Beynəlxalq Qalereya və Evento Qrup Fesilitanın birgə təşkilatçılığı ilə Azərbaycan və Hindistan mədəniyyətinə həsr olunmuş “İncəsənət sərhəd tanımır” adlı silsilə xarakterli rəsmi və bədii hissədən ibarət olan sərgi-tədbir təşkil olunub.
Avropa.info xəbər verir ki, sərgidə müxtəlif yaş qruplarından olan 200 rəssam 200 fərqli texnikada ərsəyə gətirilmiş əsərləri ilə iştirak edib.
Sərgini giriş sözü ilə açan Beynəlxalq Qalereyanın direktoru Elnurə İsgəndərova iştirakçıları salamlayaraq bildirib:
“Azərbaycanla qədim mədəni və mənəvi yaxınlığa malik olan ölkələrdən biri də Hindistan olmuşdur. Çox zəngin və mədəni rəngarəngliyə malik bu ölkə ilə Azərbaycan arasında mədəni yaxınlaşma və əlaqələrin tarixinin qədim kökləri Tunc dövründən başlayır.
Qədim Hindistan incəsənəti özünün ənənəviliyi, duyulma qabiliyyəti və simvolikliyi ilə səciyyələnir. Dünyanın ən qədim ölkələrindən biri olan Hindistan, ən qədim sivilizasiyaların önündə gedərək zəngin tarixi-mədəni irsə malikdir.
Azərbaycanın qədim milli-mənəvi dəyərləri, təbiətinin füsunkarlığı sanki musiqiyə, sənət əsərlərinə hopub. Azərbaycan incəsənəti təbiəti kimi rəngarəng, dolğun və zəngindir. Qədim milli-mənəvi dəyərləri, ənənələrini özündə yaşadan Azərbaycan bu gün dünyada müxtəlif sivilizasiyaların qovşağı kimi tanınır.
Hər iki ölkə həm keçmişdən, həm də indiki dövrdən təsirlənən zəngin və müxtəlif mədəniyyətlərə malikdir.
Hindistanın Azərbaycandakı nümayəndəliyi ilə birgə təşkil olunan bugünkü sərgi-tədbirin də hər iki ölkə arasında əlaqələrin inkişafına və incəsənətə bir töhfə olacağına inanırıq”.
Sərginin Hindistan tərəfdən təşkilatçısı, Evento Qrup Fesilitanın direktoru Srujana Çandra qeyd edib ki, Beynəlxalq Qalereya ilə dəfələrlə uğurla layihələrə imza atıblar və bu layihələrin davamlı olacağına inandığını bildirib.
Sərginin layihə rəhbəri Aygün Əzizova tədbir iştirakçılarını ürəkdən salamlayaraq aşağıdakıları qeyd edib:
“Bugünkü sərgimiz “İncəsənət sərhəd tanımır” silsiləsindən Hindistan–Azərbaycan incəsənətinə həsr olunub. Beynəlxalq Qalereya olaraq hər zaman məqsədimiz beynəlxalq əlaqələrin inkişafı və incəsənətin təbliğidir. Bugünkü sərgidə də müxtəlif yaş qruplarından 200 rəssam 200 əsəri ilə iştirak edir.
Əsərlərin hər biri Hindistan və Azərbaycan incəsənətinin keçmişdən bu günümüzə qədərki inkişaf tarixini əks etdirir. Bu möhtəşəm gündə hər birinizə uğurlar arzu edirəm”.
Sərgidə rəsmi qonaq olan Hindistanın Azərbaycandakı fövqəladə və səlahiyyətli səfirinin müavini Mr. Srinivas Rao Javvadi bütün iştirakçıları salamlayaraq deyib ki, Hindistana və Azərbaycana öz sevgilərini nümayiş etdirmiş gənc və istedadlı rəssamlar arasında olmaq onun üçün çox xoşdur.
“Bu sənət əsərləri vasitəsilə gənc istedadlar hər iki ölkənin mədəniyyət və dəyərlərini birləşdirdi. Qız qalasının və Hindistan qapısının təsviri hər iki ölkəmizi birləşdirən oxşarlığı simvollaşdırır.
Gənc rəssamlara uğurlar arzulayıram. Sənətləri ilə hər iki xalqa sülh və firavanlıq gətirsinlər”, – deyə o əlavə edib.
Sərgi-tədbirdə həmçinin Hindistan səfirliyinin digər əməkdaşları — Mrs. Usha Javvadi, Mr. Raj Kumar Gupta, Mrs. Mamta Gupta və digər nümayəndələr də iştirak edib.
Sərgidə eyni zamanda çoxsaylı media nümayəndələri də yer alıb.
Sərginin bədii hissəsi Azərbaycan və Hind musiqiləri, əsrarəngiz rəqsləri ilə davam edib.
Sonda sərgi iştirakçıları sertifikatlarla təltif olunub və xatirə fotoları çəkilib.
Aygün Oqtay,
Video-operator: Çingiz Abdullayev,
Fotolar Camalındır
