Milli Cəbhə Partiyasının (MCP) başqanı, deputat Razi Nurullayev korrupsiya faktları barədə məlumat verən şəxslərin maddi mükafatlandırılmasını məqsədəuyğun hesab etmədiyini bildirib. Onun fikrincə, əsas diqqət mükafatlandırmaya deyil, məlumat verən şəxslərin təhlükəsizliyinin və hüquqlarının real qorunmasına yönəldilməlidir.
Avropa.info xəbər verir ki, millət vəkili bu barədə Milli Məclisdə korrupsiya faktları barədə məlumat verənlərin müdafiə mexanizmləri və qanun layihəsindəki mental məqamlar barədə çıxış edərkən bildirib.
Vətəndaş təzyiqi, iş itirmək qorxusu
MCP başqanı məlumat verən şəxslərin qarşılaşdığı psixoloji və sosial çətinlikləri diqqətə çatdırıb:
“Vətəndaşlar korrupsiya faktları barədə məlumat verməzdən əvvəl iş yerlərini, gələcəklərini və ailələrinin vəziyyətini düşünürlər. İnsanlar təzyiqə məruz qalmaqdan, işlərini itirməkdən və müxtəlif maneələrlə üzləşməkdən ehtiyat etdikləri üçün qanunsuzluqlar barədə susmağa üstünlük verirlər. Məlumat verən şəxslərin kimliyinin məfiliyi qorunmalı, onların işdən çıxarılması, vəzifələrinin aşağı salınması və digər təzyiq formalarının qarşısı qətiyyətlə alınmalıdır”.
Qanun şəxsi qisasın alətinə çevrilməməlidir
Millət vəkili obyektiv araşdırmanın və hər iki tərəfin hüquqlarının qorunmasının vacibliyini vurğulayıb:
“Daxil olan məlumatlar tam obyektiv araşdırılmalıdır. Yaradılan mexanizm şəxsi münasibətlərin, qisasın və əsassız ittihamların alətinə çevrilməməlidir. Korrupsiya ilə mübarizədə həm məlumat verənin, həm də barəsində məlumat verilən şəxsin hüquqları bərabər şəkildə qorunmalıdır. Əks halda bu proses sui-istifadə hallarına yol aça bilər”.
Mental xüsusiyyətlər
Parlamentari mükafatlandırma bəndinə qarşı çıxaraq fikirlərini yekunlaşdırıb:
“Bir məsələni açıq dilə gətirmək istəyirəm. Mentalitetimizə və toplum olaraq baxışımıza görə xəbərçilik pis hal sayılır. Mental xüsusiyyətimizlə qanunun təsbitini uyğunlaşdırmaq çətin olacaq. Buna görə də mükafatın verilməsini məqbul saymıram, hərçənd ki, mükafat qanunun ana xəttidir. Korrupsiya ilə mübarizədə əsas məqsəd pul mükafatı deyil, qanunsuzluqların qarşısının alınması və dövlət idarəçiliyində şəffaflığın gücləndirilməsi olmalıdır”.
