Azərbaycan Respublikası Mədəniyyət Nazirliyi yanında Mədəni İrsin Qorunması, İnkişafı və Bərpası üzrə Dövlət Xidməti, Qobustan Milli Tarix-Bədii Qoruğu və Beynəlxalq Qalereyanın birgə təşkilatçılığı ilə Ümummilli Lider Heydər Əliyevin anadan olmasının 102-ci ildönümünə həsr olunmuş “Vətənpərvərlik Etüdləri” layihəsi çərçivəsində “Qobustan mənzərələri” adlı etüd-sərgi keçirilib.
Avropa.info xəbər verir ki, layihə rəhbəri Aygün Əzizovanın təşəbbüsü ilə reallaşan bu tədbir sənət və tarix arasında körpü quraraq iştirakçılara Qobustanın qədim irsini və təbiət gözəlliklərini rəssam fırçası ilə ifadə etmək imkanı yaradıb.
Etüddə 16 azərbaycanlı və 4 türk rəssam iştirak edərək Qobustanın unikal landşaftını, qayaüstü təsvirlərini və mədəni atmosferini fərdi sənət baxışları ilə canlandırıblar.
Qobustan Milli Qoruğunun əməkdaşı Sabir Nəzirov və digər əməkdaşlar qonaqları yüksək səviyyədə qarşılayıblar. Rəssamlara qoruğun tarixi, UNESCO-nun Dünya İrs Siyahısına daxil edilmiş qayaüstü rəsmlər və muzeydəki eksponatlar haqqında geniş məlumat verilib. Bu, iştirakçılara yalnız vizual deyil, həm də mədəni və tarixi baxımdan dərin ilham verib.
Beynəlxalq Qalereyanın direktoru Elnurə İsgəndərova tədbirin təşkilində göstərilən dəstəyə görə Qoruğun rəhbərliyinə və əməkdaşlarına təşəkkürünü bildirib. O, vurğulayıb ki, bu cür layihələr mədəni irsimizin qorunması və təbliği baxımından böyük əhəmiyyət daşıyır.
Rəssamlar gün ərzində açıq havada etüd işləri apararaq Qobustanın təbiətini və ruhunu kətan üzərində əks etdiriblər. Onların əsərləri yalnız mənzərə deyil, həm də vətənpərvərlik hisslərinin sənətdəki təcəssümü idi. Etüd zamanı yaradıcı mühit, təbiətin sükutu və tarixin nəfəsi iştirakçılara ilham verib.
Tədbir iştirakçıları Qobustana məxsus ləzzətli təamlardan dadaraq yerli mətbəxin incəlikləri ilə tanış olublar. Bu, onların mədəniyyətlə daha dərindən əlaqə qurmasına şərait yaradıb.
Tədbirin sonunda iştirakçılara sertifikatlar təqdim olunub və xatirə fotoları çəkilib. Bu, yalnız bir sənət tədbiri deyil, həm də mədəniyyətin, tariximizin və vətənpərvərlik ruhunun birgə yaşandığı unudulmaz bir gün kimi yadda qalıb.
Aygün Oqtay
Fotolar: Camalındır
