Polşanın Baş naziri Donald Tusk Polşa vətəndaşlarının həssas məlumatlarının əvvəlki hökumət dövründə istifadə edilən Pegasus casus proqramı vasitəsilə İsrailə ötürülməsini “dövlətə qarşı ağır cinayət” və “Polşa tarixinin ən böyük qalmaqallarından biri” kimi qiymətləndirib.
Avropa.info xəbər verir ki, Tusk sosial media hesabında paylaşdığı video mesajında Pegasusun İsrail şirkəti tərəfindən hazırlanmış və hərtərəfli kiber nəzarəti təmin edən bir vasitə olduğunu bildirib.
Pegasus-u inkişaf etdirən İsrail mərkəzli NSO Qrupunun İsrail kəşfiyyat xidmətləri ilə əməkdaşlıq etdiyinə şübhə olmadığını bildirən Tusk, hadisəni “Kommunizmin süqutundan sonra Polşa tarixinin ən böyük qalmaqallarından biri” olaraq xarakterizə etdi.
Donald Tusk cinayət qurbanlarına verilməli olan pulun Pegasus almaq üçün istifadə edildiyini bildirib və deyib:
“Onlar Polşada cinayət qurbanlarına verilməli olan pulu ödəyiblər ki, bu sistem üçün Polşa vətəndaşları, Polşa müxalifət liderləri və müstəqil Polşa prokurorları ilə bağlı bütün mümkün məlumatları İsrail tərəfinə ötürdü. Polşa tərəfinin buna faktiki olaraq heç bir nəzarəti yox idi.
Ədalətə və dövlətin təhlükəsizliyinə cavabdeh olan şəxslər minlərlə, on minlərlə Polşa vətəndaşının məxfi məlumatlarını heç bir nəzarət olmadan xarici bir dövlətin, İsrailin əlinə verdilər. Bu artıq qalmaqal deyil. Əslində, məncə, hamıya aydındır ki; Burada dövlətə qarşı törədilmiş ağır cinayətdən söhbət gedir. “Bunun əvəzini ödəyəcəklər”.
Mütəxəssislər sistem vasitəsilə ötürülən məlumatların Polşadan kənara getdiyini müəyyən ediblər
Polşa Milli Prokurorluğu tərəfindən 2024-cü ilin mart ayından bəri davam edən istintaq çərçivəsində əldə edilən son tapıntılarla bağlı yazılı açıqlama verilib.
Açıqlamada, Polşa Daxili Təhlükəsizlik Agentliyinin (ABW) mütəxəssislərinin Pegasus sisteminin istifadəçilərin xəbəri və icazəsi olmadan mobil cihazlardan geniş məlumat əldə edə bildiyini müəyyən etdiyi bildirilib.
Mütəxəssislər tərəfindən Polşa Mərkəzi Antikorrupsiya Bürosunun (AMB) sistemə tam nəzarət etmədiyini, proqram təminatı istehsalçısının məlumatların işləndiyi və saxlanıldığı infrastruktura çıxışının olduğunu, sistem vasitəsilə ötürülən məlumatların Polşadan kənara çıxdığını müəyyən etdiyi vurğulanıb.
Açıqlamada qeyd olunub ki, sistemin dizaynı əldə edilən məlumatların tam təhlükəsizliyinə zəmanət vermir.
Polşada Pegasus ittihamı
2023-cü ilin oktyabrında seçkilərdən sonra Polşada fəaliyyətə başlayan yeni parlamentdə “Pegasus” casus proqramının əvvəlki dövlət məmurları tərəfindən istifadə edildiyinə dair iddiaları araşdırmaq üçün xüsusi komissiya yaradılıb.
Baş nazir Donald Tusk 2024-cü ilin fevralında o vaxtkı prezident Anjey Duda ilə keçirdiyi mətbuat konfransında sələfi Morawiecki dövründə hökumət rəsmilərini “Pegasus” casus proqramından qeyri-qanuni istifadə etməkdə ittiham etdi.
