İyulun 12-də Azərbaycan Dövlət Akademik Musiqili Teatrında yazıçı-dramaturq Sabit Rəhmanın “Əliqulu evlənir” pyesi əsasında Xalq artisti İlham Namiq Kamalın librettosu və quruluşunda hazırlanan “Əliqulu bu gün evlənir” (bəstəkarı Oqtay Rəcəbov) komediyası oynanılıb. Bu dəfə səhnə əsəri teatrın tanınmış aktrisası Rəsmiyyə Nurməmmədovanın 60 illik yubileyi münasibətilə nümayiş olunub.
Avropa.info xəbər verir ki, aktrisanın həyat və yaradıcılığı barəsində tamaşaçılara ətraflı məlumat verən Akademik Musiqili Teatrın direktor müavini, sənətşünaslıq üzrə fəlsəfə doktoru Vəfa Mühacirova teatr rəhbərliyi və kollektiv adından yubilyarı təbrik edib, eyni zamanda Azərbaycan Mədəniyyət İşçiləri Həmkarlar İttifaqı Respublika Komitəsinin fəxri fərmanını ona təqdim edib.
Milli teatr sənətinin inkişafındakı xidmətlərinə görə və 60 illik yubileyi münasibəti ilə Azərbaycan Teatr Xadimləri İttifaqının təltif etdiyi mükafatı da qurumun sədr müavini Xalq artisti İlham Namiq Kamal təqdim edərək Rəsmiyyə xanıma xoş arzularını bildirib.
Qeyd edək ki, ömrünün 40 ilini teatr sənətinə həsr edən aktrisa bu səhnə əsərində Humay obrazı canlandırır. Onunla yanaşı, tamaşada Xalq artisti İlham Namiq Kamal (Əliqulu), Əməkdar artistlər Əkbər Əlizadə (Rövşən), İqrar Salamov (Səfər), Prezident mükafatçısı Səmədzadə Xasiyev (Kamal), aktyorlar Zemfira Əbdülsəmədova (Gövhər), Gülçöhrə Abdullayeva (Səadət), Əliməmməd Novruzov (Xəlil), Gülnarə Əzizova (Nazlı), Ruslan Mürsəlov (Azad), Böyükxanım Məmmədova (Heyvaxanım), Mehriban Rəcəbova (Lumuxanım), Əzizəxanım Kazımova (Qumral), həmçinin xor və balet artistləri də iştirak ediblər.
