İyun ayının 15-də Azərbaycan Dövlət Pedaqoji Universitetinin məzunu, həkim, rəssam, pedaqoq, Azərbaycan Rəssamlar İttifaqının və Beynəlxalq Qalereyanın üzvü Fərdanə Həsənzadə Ağahüseyn qızının əsərlərindən ibarət, 15 İyun – Milli Qurtuluş Gününə həsr olunmuş “Başlanğıc nöqtəsi” adlı ilk fərdi yaradıcılıq sərgisi təşkil olunub.
Avropa.info xəbər verir ki, Fərdanə Həsənzadənin rəssamlıq sahəsində istedadı hələ kiçik yaşlarından üzə çıxsa da, o, başqa – tibb sahəsinə yönəlib. Ancaq Fərdanə xanım rəssamlığa olan həvəsini, istəyini, istedadını içində boğa bilməyib.
O, yenidən rəssamlıqla məşğul olmağa başlayıb və Azərbaycan Dövlət Pedaqoji Universitetinin Təsviri incəsənət fakültəsini bitirib. Rəssam yağlı boya və dekorativ-tətbiqi sənətin müxtəlif sahələri ilə peşəkarcasına məşğul olur.
Sərgini giriş sözü ilə açan Beynəlxalq Qalereyanın direktoru Elnurə İsgəndərova qeyd edib ki, Fərdanə xanımın əsərlərində azərbaycançılığın təməl prinsipləri öz əksini tapıb.
“Əsərlərdə xalqın taleyi, düşüncəsi, əqidə və inamı əks etdirilir. Azərbaycançılıq məfkurəsinin təbliği Fərdanə xanımın yaradıcılığında özünəməxsus yer tutur”, – deyə o bildirib.
Sərgidə rəssamın müxtəlif texnikalarda 100 əsəri nümayiş olunub. Tədbirdə, eyni zamanda, fəxri qonaqlarla yanaşı, rəssamın ailə üzvləri də iştirak ediblər.
Rəssamın atası, filoloq Ələkbərov Ağahüseyn, anası, texnoloq Ələkbərova Məsməxanım, həyat yoldaşı, mühəndis Fuad Həsənzadə, bacıları – həkim Vəfa Seyfullayeva, həkim Jalə Nəsibova və digər yaxınları sənətkarın yaradıcılığını hər zaman zövqlə izlədiklərini və onunla qürur duyduqlarını bildiriblər.
Sərginin fəxri qonaqları – Mədəniyyət kanalının əməkdaşı İntizar İsmayıl, ADRA-nın müəllimi Zinaida Mirzəzadə və ADPU-nun müəllimi Tərlan Eyvazov Fərdanə Həsənzadənin əsərlərini 15 İyun – Milli Qurtuluş Gününə böyük töhfə kimi qiymətləndirib və ona uğurlar arzulayıblar.
F. Həsənzadə Beynəlxalq Qalereya tərəfindən ilk fərdi yaradıcılıq sərgisinə görə diplomla təltif olunub.
Sonda xatirə fotoları çəkilib.
Aygün Oqtay,
Fotolar Camalındır
