Avropa.info xəbər verir ki, Cəfər Cabbarlı adına Respublika Gənclər Kitabxanasında Azərbaycan elmi-nəzəri fikrinin inkişafında mühüm rol oynamış tənqidçi – ədəbiyyatşünas, filologiya elmləri doktoru, professor Əkbər Ağayevin 110 illik yubileyi münasibətilə elektron məlumat bazası hazırlanıb. Elektron baza kitabxananın rəsmi saytında https://ryl.az/melumat-bazalari/Professor_Ekber_Agayev_el_melumat_bazasi/index.html yerləşdirilib.
Bazada Əməkdar mədəniyyət işçisi Vaqif Yusiflinin “Ustad tənqidçi, görkəmli ədəbiyyatşünas”, jurnalist Tahir Abbaslının “Xoş xatirə-təəssüratlar professoru – klassik ədəbiyyatşünaslıq və tərcüməçiliyimizin şanlı nümayəndələrindən, ədəbi tənqidimizin tərifli sütunlarından – Əkbər Ağayev” məqalələrinin tam mətni, müxtəlif elm, mədəniyyət, ədəbiyyat və mətbuat nümayəndələrinin professor haqqında söylədikləri dəyərli fikirlər və Əkbər Ağayevin görkəmli ədiblərin yaradıcılığına, ədəbiyyatşünaslığa dair səsləndirdiyi düşüncələri təqdim edilir. Kitabxana əməkdaşları tərəfindən hazırlanan bazada Əkbər Ağayevin müəllifi, elmi redaktoru, tərtibçisi, rəyçisi olduğu, ön söz yazdığı kitabların, məqalələrin siyahıları, tərcümələri, haqqında müdafiə olunan dissertasiya və avtoreferatlar yer alır. Elektron bazada Əkbər Ağayevin ədəbi fəaliyyətinə həsr edilən virtual sərgi ilə yanaşı, kitabxana əməkdaşları tərəfindən hazırlanan videomaterial da sərgilənir. Materialda görkəmli professorun gənclik illəri, ədəbi, elmi-pedaqoji fəaliyyəti haqqında geniş məlumat verilir, onun dünya ədəbiyyat incilərinin Azərbaycan dilinə tərcümə edilməsi sahəsində olan danılmaz əməyi qeyd edilir. Kitabxananın rəsmi saytında yerləşdirilən videomaterialda https://ryl.az/multimedia/ekber-agayev-110 Əkbər Ağayevin tərcümə etdiyi kitabların sərgisi nümayiş olunur
