Respublika Gənclər Kitabxanasında “Ulu Öndərin “canlı əsəri” Tərlan” adlı kitabın
təqdimat mərasimi keçirilib
Avropa.info xəbər verir ki, Cəfər Cabbarlı adına Respublika Gənclər Kitabxanasında Azərbaycan Respublikası Mədəniyyət Nazirliyinin dəstəyi, “Mirvarid Dilbazi Poeziya Məclisi” İctimai Birliyinin təşəbbüsü və təşkilatçılığı ilə Prezident təqaüdçüsü, əmək qəhrəmanı, ictimai xadim Tərlan Musayevanın 70 illik yubileyi münasibəti ilə işıq üzü görən “Ulu Öndərin “canlı əsəri” Tərlan” kitabının təqdimat mərasimi təşkil edilib. Tədbirdə mədəniyyət, ədəbiyyat, ictimaiyyət, təhsil, media nümayəndələri, tələbə-gənclər iştirak edib.
Tədbiri giriş sözü ilə açan “Mirvarid Dilbazi Poeziya Məclisi” İctimai Birliyinin sədri, Kəlağayı muzeyinin direktoru, şair-publisist Güllü Eldar Tomarlı təqdimatı keçirilən kitabda Tərlan Musayevanın parlaq səhifələrlə yadda qalan ömür yolundan, ictimai fəaliyyətindən bəhs edildiyini, bu fəadakar, əməksevər, qəhrəman xanımın vətənimizdə tanınan, əməyindən, uğurlarından, gözəl insani keyfiyyətlərindən bəhs edilən məşhur Azərbaycan xanımı olduğunu vurğuladı. Tərlan Musayeva nümunəsinin müasir gənclik üçün zəhmətsevərlik, vətənpərvərlik simvolu olduğunu söylədi. Ərsəyə gələn kitabın redaktoru olduğunu vurğulayan Güllü Tomarlı Tərlan xanımın 70 illik yubileyi və ona həsr edilən kitabın təqdimatının ölkənin müxtəlif şəhər və rayonlarında, mədəniyyət ocaqlarında qeyd olunacağını bildirdi.
Kitabın müəllifi yazıçı, araşdırmaçı Vaqif Osmanlı Tərlan Musayeva kimi əmək qəhrəmanlarının nəinki bugünkü, həm də gələcək nəsillər üçün örnək olduğunu bildirərək, hələ lap gənc yaşlarından çalışdığı sahədə fədakarlığı ilə seçilən Tərlan xanımın həyatı, 21 yaşında 10 il dalbadal Sevil Qazıyeva adına mükafatın qalibi olduğunu bildirdi.
Vətən müharibəsi qazisi, şair Rafael Tağızadə “Ulu Öndərin “canlı əsəri” Tərlan” kitabında müəllifin çox böyük əmək sərf edərək bu məsuliyyətli işə əsl araşdırmaçı məharəti ilə yanaşaraq Tərlan Musayevanı nəinki bir qəhrəman xanım eyni zamanda çox nəcib, zərif, əsl Azərbaycan xanımına xas xüsusiyyətə malik olduğunu məharətli qələmi ilə təsvir edə bildiyini söylədi.
Filologiya üzrə fəlsəfə doktoru Fəridə Ləman bu kitabın Tərlan xanımın 70 illik zəngin və mənalı ömrünə müəllifin özünəməxsus yanaşması olduğunu və kitabda sadə bir zəhmət adamının şəxsiyyətinə, mənəvi dünyasına işıq salındığını bildirdi. Müəllifi olduğu Ulu Öndər Heydər Əliyevə həsr olunan, Azərbaycan və ingilis dillərində nəşr edilən “Onu zaman seçib” və “Vətən Məcnun, mən Leyli” kitablarını yubilyara hədiyyə etdi.
Əmək qəhrəmanı, ictimai xadim Tərlan Musayeva qazandığı bütün uğurlara görə özünü Ümummilli Lider Heydər Əliyevə borclu bildiyini xüsusi olaraq vurğulayaraq, onun haqqında yazılmış kitabın ərsəyə gəlməsində əməyi olan hər kəsə təşəkkür etdi. Bu cür kitab təqdimatlarının keçirilməsi əhəmiyyətindən danışaraq, tədbirin keçirilməsində yaratdıqları şəraitə görə Cəfər Cabbarlı adına Respublika Gənclər Kitabxanasının kollektivinə dərin minnətdarlığını bildirdi.
Tədbirin sonunda “Ulu Öndərin “canlı əsəri” Tərlan” kitabının imzalı nüsxələri tədbir iştirakçılarına və kitabxanaya hədiyyə edildi.
