Respublika Gənclər Kitabxanasında 21 Fevral – Beynəlxalq Ana Dili Günü münasibətilə silsilə materiallar hazırlanıb
Avropa.info xəbər verir ki, Cəfər Cabbarlı adına Respublika Gənclər Kitabxanasında 21 Fevral – Beynəlxalq Ana Dili Günü münasibətilə bu günün tarixindən, əhəmiyyətindən bəhs edən biblioqrafik icmal, ənənəvi və virtual kitab sərgisi hazırlanıb. Kitabxananın əməkdaşları tərəfindən hazırlanan materiallarda Beynəlxalq Ana Dili Gününün yaranma tarixindən, ölkəmizdə keçdiyi inkişaf mərhələsindən ətraflı bəhs edilir. Virtual sərgidə bu sahədə Ümumilli Lider Heydər Əliyevin və Prezident İlham Əliyevin müdrik siyasətinə dair fikirlər, bu sahədə imzalanan qanun və sərəncamlar haqqında məlumatlar öz əksini tapır. Kitabxananın rəsmi saytında yerləşdirilən https://ryl.az/funds/biblioqrafik-icmal materialda bu günün təsis edilməsi haqqında olan ümumi məlumatlarla yanaşı, akademik Nizami Cəfərovun “Dilin tarixi” məqaləsinin tam mətni, görkəmli şəxslərin dəyərli fikirləri, “Heydər Əliyev və Azərbaycan dilinin inkişaf konsepsiyası”, “Heydər Əliyevin dil siyasəti”, “Qədim türk yazılı abidələrinin dili”, “Dildən dilçiliyə”, “Dilimiz, düşüncəmiz”, “Müasir Azərbaycan dilinin üslubiyyatı”, “Tarixi yaddaş milli dil güzgüsündə”, “Azərbaycanşunaslıq məsələləri” kimi 30-dan çox kitabın biblioqrafik təsviri, qısa annotasiyası və 2019-2024-cü illəri əhatə edən dövri mətbuat nümunələrinin siyahısı yer alır.
“21 Fevral – Beynəlxalq Ana Dili Günü” adlı virtual kitab sərgisi kitabxananın rəsmi saytında https://ryl.az/multimedia/ana-dili-gunu yerləşdirilib.
Müəllif: Avropa.info
