XI Bakı Beynəlxalq Kitab Sərgisi çərçivəsində Milli Məclisin deputatı, yazıçı-publisist İmamverdi İsmayılovun yeni kitabı – “Bayquş və qarovulçu” oxuculara təqdim olunub.
Avropa.info xəbər verir ki, tədbirə elm, ədəbiyyat və siyasət xadimləri qatılaraq əsərlə bağlı fikirlərini bölüşüblər. Tədbir XI Bakı Beynəlxalq Kitab Sərgisinin Bəxtiyar Vahabzadə təqdimat zalında keçirilib.
Milli Məclis sədrinin müavini Ziyafət Əsgərov çıxışında bildirib ki, kitab insanı düşündürən mühüm mövzulara həsr olunub:
“Əsərdə müharibələrin, haqsızlıqların və insan faciələrinin fəlsəfi mənzərəsi yaradılıb. Bayquş obrazının mifologiyada yanlış anlamda təqdim olunmasına qarşı olaraq müəllif oxucuya göstərir ki, əslində bəşəriyyəti bəlalara sürükləyən elə insanların özüdür”.
Akademik Nizami Cəfərov isə vurğulayıb ki, əsərdə qaldırılan mənəvi problemlər müasir insan üçün çox aktualdır:
“İmamverdi İsmayılov öz yazıçı stixiyası, yazıçı təcrübəsi, gəldiyi ədəbi mənbələrin verdiyi rezonansla cəmiyyətin çox ciddi bir problemini qaldırdı. Bu problem nədən ibarətdir? Azərbaycanda da, bütün dünyada da bu gün insanlar varlanır. İnsanlar özləri üçün yaxşı həyat şəraiti qurur. Bu həyat şəraiti uğrunda mübarizə aparır. Bu, insanların təbiətidir. Biz buna bir insan olaraq etiraz edə bilmərik. Çünki bütün insanların təbiətində bu var. Bununla yanaşı, qeyd etmək lazımdır ki, mənəvi-əxlaqi dəyərlər aradan qalxırsa, zənginliyin özünü də idarə etmək olmur. Faktiki olaraq, insan o zənginliyin daxilində ruhən kasıblaşır. Heç o zənginlik də ona lazım olmur. Bu hekayədən mənim çıxardığım nəticənin biri bundan ibarətdir. Amma bu hekayə haqqında yazanların hərəsi müxtəlif nəticələr çıxarıb. Bu, təkcə hekayəyə münasibətdən irəli gəlmir, həm də yazıçının imkanlarından, düşüncəsinin polifonikliyindən irəli gəlir”.
AMEA-nın prezidenti, akademik İsa Həbibbəyli “Bayquş və qarovulçu” hekayəsini Azərbaycan ədəbiyyatında yeni yanaşma kimi qiymətləndirib:
“Müəllif ilk dəfə bayquşu müsbət obrazda təqdim edir. Əsərdə qəhrəmanların adının olmaması da universal məna daşıyır. Yəni söhbət təkcə bir millətdən deyil, bütün bəşəriyyətdən gedir”.
Professor Cahangir Məmmədli isə müəllifin tələbəlik illərindən bədii yaradıcılıqla məşğul olduğunu xatırladaraq, onun ilk hekayəsinin hələ “Ulduz” jurnalında dərc olunduğunu qeyd edib.
Tədbirdə yazıçı Seyran Səxavət, Sosial Tədqiqatlar Mərkəzinin İdarə Heyətinin sədri, deputat Zahid Oruc, Yazıçılar Birliyinin katibi Elçin Hüseynbəyli, Qubadlı rayonundan olan Əməkdar müəllim Ədalət Əsədov və Zəngilan rayon Ağsaqqallar Şurasının sədri Xuduş İsgəndərov çıxış edərək, müəllif və kitabla bağlı ürək sözlərini dilə gətiriblər.
Sonda çıxış edən İmamverdi İsmayılov tədbir iştirakçılarına və əsər barədə məqalələr yazan müəlliflərə təşəkkürünü ifadə edib:
“Düşünməzdim ki, hekayə bu qədər rəğbət qazanacaq. Dünyada müharibə təhlükəsi artır, amma biz Ali Baş Komandan, Prezident İlham Əliyevin rəhbərliyi və Ordumuzun qəhrəmanlığı sayəsində qalibiyyət bayrağı altında birləşmişik. Dövlətimizin başçısının uzaqgörən siyasəti bizi müqəddəs amal ətrafında toplayıb. Mənim fəaliyyətimə dəyər verən insanlara, həmçinin deputat mandatını qazanmama səbəb olan Zəngilan və Qubadlı sakinlərinə minnətdaram”.
Bayquş və qarovulçu” həm ədəbi, həm də fəlsəfi baxımdan diqqət çəkən əsər kimi sərginin maraqlı təqdimatlarından birinə çevrilib.
Qeyd edək ki, İmamverdi İsmayılovun təqdim olunan kitabında “Bayquş və Qarovulçu” hekayəsi haqqında yazılan məqalələr də yer alıb.
Onu da xüsusilə qeyd etmək yerinə düşər ki, İmamverdi İsmayılovun “Bayquş və Qaraovulçu” kitabının təqdimatı və imza günü böyük anlşlaqla keçirilib.
