Milli Məclisin Mədəniyyət Komitəsinin sədri, Xalq artisti Polad Bülbüloğlu Azərbaycan Dövlət Akademik Musiqili Teatrının qonağı olub və teatrın repertuarında özünəməxsus yeri olan “Leyli və Məcnun” tamaşasına baxıb.
Avropa.info xəbər verir ki, tamaşadan sonra səhnə arxasında yaradıcı heyətlə görüşən Polad Bülbüloğlu sənət ocağının direktoru, Əməkdar incəsənət xadimi, fəlsəfə doktoru Əliqismət Lalayevə və bütün iştirakçılara xoş təəssüratlarını bildirərək hər kəsi təbrik edib.
“Akademik Musiqili Teatrın layihələrini maraqla izləyirəm və hər bir uğurunuza çox sevinirəm. Ölkə başçısının sərəncamı ilə teatr binasının əsaslı təmirindən sonra yaradılan şərait də müxtəlif janrlı tamaşaların ərsəyə gəlməsinə böyük imkanlar yaradır. Digər səhnə əsərləriniz kimi, “Leyli və Məcnun”u da böyük maraqla izlədim. Simfonik orkestr, peşəkar aktyorlar, xor-balet artistlərinin ifaları çox yaxşıdır.
Yaranışından bir əsrdən çox zaman keçsə də, öz aktuallığını, yüksək dəyərini itirməyən bu əsəri Opera Teatrının repertuarında, şöhrətli sənətkarlarımızın ifalarında çox görmüşəm. Musiqili Teatrın yeni yozumda bu təqdimatı, həqiqətən də, böyük məsuliyyətdir və tamaşanın kifayət qədər uğurlu alındığının şahidi oldum”, – deyə o bildirib.
Komitə sədri kollektivi təbrik edərək hər birinə fəaliyyətlərində müvəffəqiyyətlər arzulayıb. Sonda onlarla xatirə şəkilləri çəkilib.
Qeyd edək ki, libretto müəllifi və quruluşçu rejissoru Samir Qulamov olan tamaşa dahi bəstəkar Üzeyir Hacıbəylinin muğam operası və Məhəmməd Füzulinin eyniadlı poemasının motivləri əsasında hazırlanıb. Quruluşçu dirijoru Əməkdar incəsənət xadimi Fəxrəddin Atayev, quruluşçu rəssamı Vüsal Rəhim, xormeysteri Əməkdar artist Vaqif Məstanov, quruluşçu baletmeysteri Əməkdar artist Emin Əliyev, rejissor assistenti Sevinc Məmmədova olan bu tamaşada Əməkdar artist Nadir Xasiyev, Prezident mükafatçısı Səmədzadə Xasiyev, respublika və beynəlxalq muğam müsabiqələrinin qalibləri İlahə Rüstəmova və Orxan Hüseynli, aktyorlar Emin Zeynallı, Gülnarə Abdullayeva, Azər Pənahov, Bacıxanım Sadıqova, Böyükxanım Məmmədova, Mirzəhra Muradova, Aydan Əliyeva, həmçinin xor və balet artistləri iştirak ediblər.
Avropa.info
