Pakistan təhlükəsizlik qüvvələri Əfqanıstanla sərhəddə yerləşən Hayber-Paxtunxva əyalətində antiterror əməliyyatı keçirib və 29 yaraqlını öldürüb.

Avropa.info xəbər verir ki, bu barədə Pakistanın informasiya və yayım naziri Attaullah Tarar məlumat verib.

Onun sözlərinə görə, əməliyyat kəşfiyyat məlumatları əsasında həyata keçirilib. Quru əməliyyatından sonra təhlükəsizlik qüvvələri Pakistan-Əfqanıstan sərhədi boyunca Camaat ül-Əhrar və Fitna əl-Xaverij sığınacaqlarına və düşərgələrinə zərbələr endirib. Əməliyyat zamanı silah və sursat anbarları da daxil olmaqla yaraqlıların üç obyekti də məhv edilib.

Tarar vurğulayıb ki, ölkənin təhlükəsizliyinə təhdidlər tamamilə aradan qaldırılana qədər antiterror əməliyyatları davam edəcək.

Pakistan ordusunun məlumatına görə, 2025-ci ilin əvvəlindən bəri ölkədə 2597 yaraqlı öldürülüb. Bu dövrdə 5397 terror hücumu baş verib və nəticədə 1235 nəfər həlak olub