“12 dekabr Azərbaycan xalqı üçün yalnız bir anım günü deyil, həm də milli yaddaşın, qürurun və dövlətçilik düşüncəsinin təcəssümüdür. Bu gün xalqımız müasir Azərbaycanın qurucusu, dövlətçiliyimizi ən çətin sınaqlardan keçirərək sağlam təməllər üzərində bərqərar edən Ulu Öndər Heydər Əliyevi sonsuz hörmət və ehtiramla yad edir”.
Bunu Avropa.info-ya açıqlamasında Milli Məclisin deputatı Aydın Hüseynov deyib.
Deputat bildirib ki, XX əsrin sonlarında Azərbaycan öz müstəqilliyini yenidən bərpa etdikdən sonra tarixin ən həlledici anlarını yaşayırdı: “Xaos, təlatüm, parçalanma təhlükəsi… Vətənin taleyi sual altında idi. Məhz belə bir dövrdə xalqın çağırışı ilə hakimiyyətə qayıdan Ulu öndər Heydər Əliyev Azərbaycanın xilaskarı kimi tarix səhnəsində yenidən göründü. Onun müdrik və qətiyyətli siyasəti ölkəni uçurumdan xilas etdi, sabitlik və dövlətçilik prinsiplərini bərpa etdi, müstəqil Azərbaycanın yenidən doğuluşuna yol açdı”.
O əlavə edib ki, Ümumilli lider Heydər Əliyevin müəyyən etdiyi inkişaf strategiyası Azərbaycanın gələcək uğurlarının bünövrəsi oldu: “Siyasi sabitlik, güclü iqtisadiyyat, dünya ilə açıq və balanslı əlaqələr, neft strategiyası və qlobal enerji xəritəsində ölkəmizin yerinin möhkəmləndirilməsi — bütün bunlar Azərbaycanı regionun lider dövlətinə çevirdi. “Əsrin müqaviləsi” isə təkcə iqtisadi layihə deyil, Azərbaycanın beynəlxalq nüfuzunun artmasına xidmət edən tarixi addım idi.
Bu gün Ulu Öndərin siyasi irsi onun layiqli davamçısı Prezident İlham Əliyev tərəfindən uğurla və böyük qətiyyətlə həyata keçirilir. Müasir dünyanın çağırışlarına uyğunlaşdırılmış inkişaf modeli Azərbaycanı yeni zirvələrə aparır. Prezident İlham Əliyevin liderliyi sayəsində ölkəmiz həm siyasi, həm iqtisadi, həm də hərbi güc baxımından regionun ən qüdrətli dövlətinə çevrilib. Vətən müharibəsində əldə olunan tarixi Zəfər isə bu siyasətin və xalq–dövlət birliyinin parlaq təcəssümüdür. Azərbaycan bu gün qalib dövlət, qalib xalq kimi tarixdə öz adını qızıl hərflərlə yazdırıb.
Ulu Öndərin ideyalarına söykənən dövlət siyasəti bu gün Cənubi Qafqazda və bütövlükdə Avrasiyada yeni reallıqlar yaradıb. Azərbaycan mürəkkəb geosiyasi proseslər fonunda böhranları fürsətə çevirərək regional tərəfdaşlıq, nəqliyyat-kommunikasiya əlaqələri və enerji təhlükəsizliyi sahələrində əsas söz sahibinə çevrilib. Bu reallıqlar həm regionun gələcəyini, həm də Azərbaycanın strateji mövqeyini müəyyənləşdirir.
Bu gün Azərbaycan Heydər Əliyev yolunun doğruluğunu öz nailiyyətləri ilə sübut edir. Ölkənin siyasi sabitliyi, iqtisadi gücü, beynəlxalq nüfuzu və hərbi qüdrəti durmadan artır. Dövlətçilik ənənələri daha da möhkəmlənir, yeni regional və qlobal əməkdaşlıq formatları yaranır, Azərbaycan yüksəlişini davam etdirir”.
