Ermənistanın vətəndaş cəmiyyəti strukturlarında və media resurslarında Azərbaycana qarşı revanşist meyllərin davam etməsi, eləcə də Alban kilsələri başda olmaqla tarixi-mədəni irsimizə qarşı ərazi və mənimsəmə iddialarının irəli sürülməsi iki ölkə arasında etimad quruculuğu prosesinə ciddi zərbə vurur. Belə bir şəraitdə qeyri-səmimi dialoq formatlarında iştirak etmək real sülh prosesinə töhfə vermir.

Avropa.info xəbər verir ki, bunu Sosdem.az-a açıqlamasında Milli Cəbhə Partiyasının (MCP) başqan müavini, politoloq Məhəmməd Əsədullazadə Azərbaycanın Ermənistanda keçirilməsi nəzərdə tutulan “Sülh körpüsü” toplantısına qatılmaqdan imtina etməsini və vətəndaş cəmiyyətləri arasındakı mövcud vəziyyəti şərh edərkən bildirib.

Şərhçi Ermənistan tərəfinin hələ də düşmənçilik ritorikasından əl çəkmədiyini diqqətə çatdırıb:

“Ermənistanın vətəndaş cəmiyyəti strukturlarında hələ də revanşizm meylləri qalmaqdadır. Erməni mediası hələ də qədim alban kilsələrini öz adına çıxarır, Azərbaycana qarşı ərazi iddiaları irəli sürür. Ona görə də Azərbaycan Ermənistanda keçirilməsi nəzərdə tutulan ‘Sülh körpüsü’ toplantısına qatılmağı məqsədəuyğun hesab etməyib. Çünki bir neçə dəfə vətəndaş cəmiyyəti üzvləri görüşsə və müxtəlif tədbirlər keçirsə də, hələ də Ermənistanın vətəndaş cəmiyyəti nümayəndələri arasında Azərbaycana qarşı revanşizm, Azərbaycanın tarixi irsini mənimsəmək kimi iddialar mövcuddur”.

Ekspert bu formatda təmasların dayandırılmasının zəruriliyini və Ermənistan rəhbərliyinin üzərinə düşən məsuliyyəti vurğulayıb:

“Ona görə də Azərbaycan hələlik vətəndaş cəmiyyəti üzvlərinin bu formatda görüşlərini dayandırmalıdır. Ermənistan hökuməti də vətəndaş cəmiyyəti üzvlərinə konkret mesajlar verməli, Azərbaycan tarixinə qarşı yönəlmiş iddialara son qoyulmasını təmin etməlidir”.

MCP rəsmisi təmasların bərpası üçün əsas şərti açıqlayaraq fikirlərini yekunlaşdırıb:

“Vətəndaş cəmiyyəti üzvlərinin görüşləri və dialoq prosesi yalnız iki ölkə arasında yekun sülh müqaviləsi imzalandıqdan sonra bərpa oluna bilər. Əks halda, Ermənistandakı revanşist mühit fonunda atılan addımlar heç bir real nəticə verməyəcək”.