Misir Mədəniyyət Mərkəzi və Beynəlxalq Qalereyanın birgə təşkilatçılığı ilə RF ART Studionun rəhbəri Fidan Rüstəmzadənin tələbələri ilə birlikdə hazırlanan, layihə rəhbəri Aygün Əzizovanın olduğu “Misir Azərbaycan Rəssamlarının Gözü ilə” adlı 3-cü fərdi yaradıcılıq sərgisi keçirilib.
Avropa.info xəbər verir ki, sərgidə fəxri qonaqlar sırasında ilkxeber.org saytının rəhbəri Xanoğlan Əhmədov, “Təzadlar” qəzetinin redaktoru Yasəmən Məmmədova, jurnalist Günel Həsənova, Azərbaycan Rəssamlar İttifaqının üzvləri və tanınmış rəssamlar iştirak ediblər. Qonaqlar arasında ADRA-nın müəllimi Zinaida Mirzəzadə, rəssamlar Vüsalə Bəkirova, Tatyana Simonova, Dinara İsmayılova, Rəhimə Əsədullayeva, Günay Məmmədova və Aygün Kamilqızı da yer alıblar.
Tədbiri giriş sözü ilə Misir Mədəniyyət Mərkəzinin rəhbəri Tarek Aboul Fotouh açaraq qonaqları salamlayıb. O, Beynəlxalq Qalereya ilə əməkdaşlığın iki dost dövlət – Misir və Azərbaycan arasında mədəni əlaqələrin inkişafına mühüm töhfə verdiyini vurğulayıb.
Daha sonra söz Beynəlxalq Qalereyanın direktoru Elnurə İsgəndərovaya verilib. O, Fidan Rüstəmzadəni və tələbələrini 3-cü fərdi yaradıcılıq sərgisi münasibətilə təbrik edərək onlara gələcək fəaliyyətlərində uğurlar arzulayıb.
Sərgidə 40 iştirakçı Azərbaycan və Misir mədəniyyətinə xas ornamentlərdən istifadə edərək müxtəlif sənət əsərləri təqdim edib. Nümayiş olunan tablolar iki ölkənin mədəniyyətlərinin sintezini əks etdirərək tamaşaçılara həm estetik, həm də mənəvi zövq bəxş edib.
Tədbir çərçivəsində qonaqlara ənənəvi Misir şirniyyatlarından ibarət süfrə təqdim olunub. Sonda iştirakçılara sertifikatlar verilib, xatirə fotoları çəkdirilib.
Qeyd edək ki, sərgi bir daha incəsənətin xalqlar arasında mədəni körpü rolunu oynadığını və dostluq münasibətlərinin möhkəmlənməsinə xidmət etdiyini nümayiş etdirib.
Aygün Oqtay,
Fotoların müəllifi: Camal
