Avropa.info xatırladır ki, atəşkəs elan olunmasına baxmayaraq, Ermənistan silahlı qüvvələri əldə edilən razılığı kobud şəkildə pozur. Azərbaycanın Ağdam və Tərtər rayonları artilleriya atəşinə tutulur. Bir neçə saat sonra isə Ermənistan silahlı qüvvələri cəbhənin Hadrut və Cəbrayıl istiqamətlərində hücuma cəhd göstərir. Gecədən etibarən səhər saatlarınadək Azərbaycan Ordusunun davam etdirdiyi hücum əməliyyatı nəticəsində düşmənin xeyli sayda canlı qüvvəsi, 13 ədəd tankı, dörd ədəd “BM-21” “Qrad” yaylım atəşli reaktiv sistemi, altı ədəd “D-20” və “D-30” topu, üç ədəd 2S3 “Akasiya” özüyeriyən artilleriya qurğusu, iki ədəd M55 “Zastava” zenit qurğusu, iki radiolokasiya stansiyası və radioelektron mübarizə vasitələri dəqiq atəşlə məhv edilir və sıradan çıxarılır. Bununla yanaşı, Ermənistan ordusunun bütün havadan müdafiə sistemini yönəldən, Xocalıda yerləşən ən bahalı 19J6 (“ST-68U”) radiolokasiya stansiyası məhv edilir.

Ermənistan tərəfi mənfur xislətinə sadiq qalaraq, bu dəfə də döyüşləri cəbhə bölgəsindən kənara daşıyaraq dinc əhalini və mülki infrastrukturu hədəf alır. Belə ki, axşam saatlarında Ermənistan silahlı qüvvələri tərəfindən Ağdam rayonunun Çəmənli və Zəngişalı kəndləri ağır artilleriyadan intensiv atəşə tutulur. Top mərmisinin partlaması nəticəsində 1974-cü il təvəllüdlü, Çəmənli kənd sakini Gündüz Taryel oğlu Hüseynov həlak olur. Humanitar atəşkəs rejimini kobud şəkildə pozan Ermənistan silahlı qüvvələri gecə saatlarından etibarən Tərtər şəhərini artilleriya atəşinə tutur. Bu bir daha bütün dünyaya nümayiş etdirir ki, Ermənistan rəhbərliyinin atəşkəs çağırışları riyakarlıqdan başqa bir şey deyil.

Müharibəni dinc əhaliyə və yaşayış məntəqələrinə zərər vurmadan aparan Azərbaycan Ordusu isə nəinki öz torpaqlarını işğaldan azad etməyə, doğma yurdundan didərgin salınan soydaşlarımızı ən qısa zamanda evlərinə qaytarmağı qarşısına məqsəd qoyur. Elə həmin gün Prezident İlham Əliyevin Rusiyanın RBK telekanalına müsahibəsində dediyi kimi:

“Biz məcburi köçkünlər üçün tikinti proqramına əsasən, təkcə bu il yeddi min mənzil istifadəyə verəcəyik. Təsəvvür edirsinizmi? Orta hesabla hər mənzildə beş nəfər nəzərdə tutulsa, biz bir ildə 35 min nəfəri yerləşdirəcəyik. Yəni bu, kiçik və ya hətta bizim şəraitdə orta ölçüdən böyük bir şəhər deməkdir. Zərərçəkmiş 300 mindən çox köçkünü artıq yerləşdirmişik. Köçkünlər üçün şərait yaratmaq məqsədilə biz hər il büdcədən külli məbləğdə vəsait ayırırıq. Hər bir köçkün hər ay dövlətdən müavinət alır. Demək istəyirəm ki, orada biz bu işləri görəcəyik. Biz Cəbrayılı təzədən tikəcəyik. Bütün kəndləri yenidən quracağıq. Orada yaşayacaq insanlar tikinti işlərinə cəlb ediləcəklər. Onlar öz evlərini bərpa etmək üçün məvacib alacaqlar. Oraya həyat qayıdacaq, oraya uşaqların gülüşü qayıdacaq. İnsanlar rahat nəfəs alacaq, hiss edəcəklər ki, ləyaqətlərini özlərinə qaytarıblar. İllər boyu azərbaycanlıların bu vəziyyətdə necə yaşamalarını təsəvvür edin. Təmas xəttində binoklla baxanda bizim dağıdılmış şəhərləri görərkən mənim keçirdiyim hissləri təsəvvür edin. Qoy erməni tərəfi fikirləşsin. O indi bunun nə demək olduğunu başa düşməyəcək. Lakin əvvəl düşünmək lazım idi, azərbaycanlıların hisslərini təhqir etmək lazım deyildi. Biz xeyirxah, sülhsevər xalqıq. Lakin biz öz ləyaqətimizi tapdalamağa, bizi təhqir etməyə imkan verməyəcəyik. Paşinyan Şuşada, Cıdır düzündə sərxoş halda rəqs edəndə özünə bu gün baş verənlər barəsində hökm imzalamışdı”.