Azərbaycan Respublikasının Qeyri-Hökumət Təşkilatlarına Dövlət Dəstəyi Agentliyinin dəstəyi ilə “Sosial İslahatlara Dəstək” İctimai Birliyi tərəfindən həyata keçirilən “Peşəni seç, gələcəyinin memarı ol” layihəsi çərçivəsində 13 may 2026-cı il tarixində Bakı şəhərinin Pirallahı rayonunda yerləşən Gənclər Evində, müəssisə rəhbərliyinin və gənclərin iştirakı ilə maarifləndirici görüş keçirilib.
Tədbirdə çıxış edən “Sosial İslahatlara Dəstək” İctimai Birliyinin sədri Namiq İnşallahoğlu layihənin məqsədləri, əhəmiyyəti və gözlənilən nəticələri barədə iştirakçılara ətraflı məlumat verib. O bildirib ki, gənclərin bilik və bacarıqlarının inkişaf etdirilməsi, onların əmək bazarının tələblərinə uyğun hazırlanması və gələcək karyeralarının düzgün istiqamətləndirilməsi layihənin əsas hədəflərindəndir.
Daha sonra çıxış edən fəlsəfə doktoru, təlimçi Qədim Qubadov iştirakçıları salamlayaraq onlara gələcəyin peşələri, əmək bazarında daha çox tələb olunan ixtisaslar, uğurlu karyera quruculuğunun əsas prinsipləri, şəxsi inkişaf, motivasiya, düzgün peşə və karyera planlaması, həmçinin əmək bazarında uğur qazanma yolları barədə ətraflı məlumat verib. Təlimçi iştirakçıları maraqlandıran sualları da cavablandırıb və praktiki tövsiyələrini bölüşüb.
Tədbirdə qeyd olunub ki, layihə Azərbaycan Respublikasının Prezidenti cənab İlham Əliyevin rəhbərliyi ilə ölkədə həyata keçirilən gənclər siyasəti, insan kapitalının inkişafı, məşğulluğun artırılması və gənclərin peşə bacarıqlarının formalaşdırılması istiqamətində müəyyən edilmiş dövlət proqramları və təşəbbüslərinə uyğun olaraq icra edilir. Bildirilib ki, bu kimi layihələr gənclərin əmək bazarına daha hazırlıqlı daxil olmasına, onların sosial fəallığının və özünəinamının artmasına mühüm töhfə verir.
Tədbirin ikinci hissəsində sertifikatların təqdimat mərasimi keçirilib. Mərasimdə çıxış edən Azərbaycan dili müəllimi, əməkdar pedaqoq Sevinc Əliyeva iştirakçıları salamlayaraq peşə seçimi və şəxsi inkişaf mövzularında hazırlanmış inşa materiallarının əhəmiyyəti barədə ətraflı məlumat verib. Daha sonra layihə çərçivəsində fəal iştirak edən yeniyetmə və gənclərə sertifikatlar təqdim olunub.
Pirallahı Gənclər Evinin rəhbərliyi çıxış edərək bu cür layihələrin davamlı keçirilməsinin gənclərin öz maraq və bacarıqlarını daha yaxından tanımasına, düzgün peşə seçimi etməsinə və gələcək karyeralarını daha planlı şəkildə qurmasına mühüm dəstək verdiyini vurğulayıb. Eyni zamanda, layihənin həyata keçirilməsinə göstərilən dəstəyə görə Azərbaycan Respublikasının Qeyri-Hökumət Təşkilatlarına Dövlət Dəstəyi Agentliyinə və “Sosial İslahatlara Dəstək” İctimai Birliyinə təşəkkür ifadə olunub.
Sonda təltif olunan iştirakçılarla xatirə şəkilləri çəkdirilib.
