Fələstinə dəstək verdiyi üçün vizası ləğv edildikdən sonra ABŞ-da saxlanılan universitet tələbəsi Rümeysa Öztürkün köçürmə tələbi qəbul edilib. Öztürk məhkəmə zamanı Vermontdakı dinləmələrə şəxsən qatıla biləcək.
Avropa.info xəbər verir ki, ABŞ-da federal hakim Uilyam K. Sessions Rümeysa Öztürkün Luizianadan Vermonta köçürülməsi ilə bağlı vəkillərin təqdim etdiyi ərizədən sonra qərar verib.
“Öztürk həbsi və saxlanması ilə bağlı ciddi konstitusiya narahatlıqlarını ortaya atıb. Bu narahatlıqlar bu məhkəmə tərəfindən tam və ədalətli şəkildə nəzərə alınmalıdır”. Sessions, mayın 9-na təyin edilmiş zaminə buraxılma iclasından əvvəl türk tələbənin mayın 1-dək Luizianadan Vermonta köçürülməsini əmr edib.
Öztürkün vəkilləri məhkəməyə ərizə təqdim edərək, onun sağlamlıq vəziyyətini əsas gətirərək, müvəkkillərinin aprelin 18-dək azadlığa buraxılmasını və ya Luizianadan Vermonta köçürülməsini istəyiblər.
Öztürkün saxlanması
Massaçusetsdəki Tufts Universitetində doktoranturasını davam etdirən Rümeysa Öztürk martın 25-i axşam dostları ilə iftar yeməyinə gedərkən küçədə 6 maskalı ICE işçisi tərəfindən saxlanılıb və 24 saat ərzində Vermont, sonra isə Luiziana ştatındakı təcridxanaya aparılıb.
Massaçusets əyalətinin hakimi Denise Casper vəkillərinin təcili müraciəti əsasında türk tələbə Öztürkün deportasiyasının dayandırılmasına qərar verib və aprelin 4-də hazırladığı hesabatda Luiziana ştatında həbsdə olan Öztürkün Vermontda mühakimə olunmasının məqsədəuyğun olacağını bildirib.
Casper qərarının səbəbi kimi türkiyəli tələbənin Vermontda ICE əməkdaşları tərəfindən saxlanılmasını və Öztürkün vəkillərinin martın 25-nə keçən gecə məhkəməyə vəsatət qaldırdığı saatlarda hələ də Luiziana ştatına köçürülməməsini göstərib.
ABŞ dövlət katibi Marko Rubio Öztürkün tələbə vizasının ləğv edildiyini və deportasiya ediləcəyini açıqlayıb.
