Müəllimlik yalnız bilik öyrətmək deyil, həm də insan yetişdirmək, gələcəyə yol göstərmək, bir ömrün yaddaşında iz qoymaqdır. 34 illik pedaqoji fəaliyyəti ilə bu missiyaya sədaqətlə xidmət edən Samux rayonu Qarayeri qəsəbə 1 saylı məktəb-liseyin müəllimi, “İnnovasiya və Qadın İnkişafı Təşəbbüsləri” İctimai Birliyinin sədri Gülnarə Əmiraslanova üçün də müəllimlik məhz belə bir həyat fəlsəfəsidir.
Onun pedaqoji fəaliyyətində illər, texnologiyalar və tədris metodları dəyişsə də, dəyişməyən əsas dəyər uşaqlara olan sevgi və onların gələcəyinə inamdır. Gülnarə Əmiraslanova uzun illərin təcrübəsindən çıxış edərək müasir şagirdin dünyasını, təhsildə baş verən dəyişiklikləri, müəllim-valideyn münasibətlərini və gəncliyə yanaşmanın vacibliyini özünəməxsus səmimiyyətlə ifadə edir.
Təhsildən kənarda da fəal ictimai fəaliyyəti ilə seçilən müsahibimiz qadınların cəmiyyətdə fəallığının artırılması, gənclərin maarifləndirilməsi və ictimai təşəbbüslərin dəstəklənməsi istiqamətində çalışır. Onun fikrincə, müəllim sinifdən kənarda da öz missiyasını davam etdirir. Bu missiyanın da əsas prioriteti cəmiyyətə fayda vermək, insanları maarifləndirməkdir.
5 Oktyabr – Beynəlxalq Müəllimlər Günündə 34 illik pedaqoji yolun bəzi məqamlarına nəzər salır, müəllimlik fəlsəfəsi, müasir gənclik, təhsilin dəyişən siması və gələcəyin nəslinə veriləcək ən vacib dəyərlər haqqında Gülnarə Əmiraslanova ilə söhbətləşdik.
Avropa.info həmin müsahibəni təqdim edir:
– Gülnarə xanım, arxada qalan illərə baxanda 5 Oktyabr sizin üçün nəyi ifadə edir? Məktəbə ilk addım atdığınız illərlə bu gün arasında hansı fərqlər var?
– Müəllimlik mənim üçün sadəcə peşə deyil, həyat tərzi, taleyin özüdür. 34 illik yolumda hər şagird mənim üçün bir dünyadır. İlk illərdə tədris daha çox ənənəvi sinif mühitində qurulurdu. Bu gün isə rəqəmsal dövrün çağırışları, uşaqların dəyişən düşüncə tərzi var. Amma dəyişməyən tək bir şey var: uşaqlara olan sevgimiz və onların gözündəki işığı görmək arzusu.
– 34 illik uzun və şərəfli bir yol… Bu illər ərzində ən çox unutmadığınız, sizi kövrəldən və ya qürurlandıran hansı xatirə olub?
– Bilirsinizmi, illər keçdikcə rəqəmlər unudulur, amma uşaqların baxışları, onların səmimiyyəti qalır. Ən böyük qürurum illər öncə dərs dediyim şagirdlərin bu gün cəmiyyətdə müxtəlif sahələrdə uğur qazandığını, Vətənə ləyaqətlə xidmət etdiyini görməkdir. Yolda məni dayandırıb: “Gülnarə müəllim, mən sizin şagirdiniz olmuşam”, – demələri bütün yorğunluğumun ən gözəl qarşılığıdır.
– Uşaqların diqqətini dərsə cəlb etmək, onlara öyrənməyi sevdirmək üçün hansı üsullardan istifadə edirsiniz? Müasir şagirdlərin diqqətini necə çəkirsiniz?
– Müasir şagirdlər dinamikdir, onlar hər şeyi tez qavrayırlar, amma həm də tez yorulurlar. Buna görə də dərslərimizi darıxdırıcı çərçivədən çıxarıb, oyun elementli, interaktiv və vizual formalarda qurmağa çalışıram. Uşağın təfəkkürünə və maraq dairəsinə yol tapanda, istənilən mövzu maraqlı gəlir.
– Təhsil ocağındakı fəaliyyətinizlə yanaşı, siz həm də fəal ictimai xanımsınız, “İnnovasiya və Qadın İnkişafı Təşəbbüsləri” İctimai Birliyinə rəhbərlik edirsiniz. Pedaqoji fəaliyyətlə ictimai işi uzlaşdırmaq necə alınır?
– İctimai fəaliyyət mənim ruhumun bir parçasıdır. Cəmiyyətdə, xüsusilə bölgələrdə qadınların fəallığının artması, gənclərin maariflənməsi mənim üçün çox önəmlidir. Həyata keçirdiyimiz işlər, layihələr insana əlavə güc verir. Müəllim sinifdən kənara çıxanda da müəllimdir – onun missiyası cəmiyyəti işıqlandırmaq, ətrafına faydalı olmaqdır.
– Bəzən eşidirik ki, “indiki gənclər, indiki uşaqlar başqadır”. Siz uzun illərin təcrübəli müəllimi kimi gəncliyi necə görürsünüz?
– Mən heç vaxt indiki gəncləri qınamıram. Onlar çox ağıllı, təfəkkürlü, sürətli düşünən nəsildir. Sadəcə, onların istiqamətə, düzgün yönləndirilməyə ehtiyacı var. Əgər siz onlara səmimi yanaşsanız, onların dilində danışsanız, onlar sizə dağlar aşırar. Gənclərimizə inamsızlıq yox, onlara dəstək olmaq lazımdır.
– Pedaqoji fəaliyyətinizdə düstura çevirdiyiniz, hər zaman əməl etdiyiniz bir prinsip varmı?
– Mənim əsas prinsipim dürüstlük və səmimiyyət üzərində qurulub. Şagirdlərə qarşı həmişə ədalətli olmaq, onları fərd kimi qəbul etmək lazımdır. Uşaqlar çox həssasdırlar; onlar müəllimin qəlbindəki səmimiyyəti dərhal hiss edirlər. Əgər sinfə təmiz qəlblə və sevgi ilə girirsinizsə, şagirdlər də bunu görür və sizə həmin məhəbbətlə cavab verirlər.
– Sürətlə dəyişən dünyada uşaqlarda kitablara, mütaliəyə və əsl mənəvi dəyərlərə marağı qorumaq üçün nələrə diqqət etməliyik?
– Etiraf edək ki, rəqəmsal əsrdə ekranlar uşaqların həyatında böyük yer tutur. Amma onları kitaba, mənəvi dəyərlərə bağlamağın tək yolu təzyiq göstərmək deyil, şəxsi nümunə olmaqdır. Müəllim və valideyn özü oxuyursa, dəyərlərə hörmət edirsə, uşaq da mütləq o yolu seçir. Kitab insanın daxili dünyasını zənginləşdirən ən güclü vasitədir.
– İllər keçir, məktəblər, dərsliklər, texnologiyalar dəyişir. Əsl müəllim obrazı ilə bağlı sizin üçün dəyişməz olaraq qalan nədir?
– Dəyişməyən tək bir şey var: müəllimin ürəyi və məsuliyyəti. Texnologiya nə qədər inkişaf etsə də, lövhə dəyişib elektron ekran olsa da, uşağın insani dəyərlərə, qayğıya olan ehtiyacı heç vaxt dəyişmir. Əsl müəllim təkcə bilik verən deyil, həm də uşağın xarakterini, şəxsiyyətini formalaşdıran insandır.
– Bu gün ilk addımlarını atan gənc həmkarlarınıza və öz əziz şagirdlərinizə bayram tövsiyəniz nə olardı?
– Gənc həmkarlarıma tövsiyəm odur ki, işlərinə sevgi ilə yanaşsınlar, heç vaxt öyrənməkdən yorulmasınlar. Çünki müəllim özü oxuduqca müəllimdir. Şagirdlərimizə isə hər zaman deyirəm: oxuyun, düşünün, kökünüzə, dəyərlərinizə bağlı qalın. Sizin uğurunuz bizim ən böyük sərvətimizdir.
Bütün həmkarlarımı Beynəlxalq Müəllimlər Günü münasibətilə ürəkdən təbrik edirəm, onlara peşə fəaliyyətlərində uğurlar və yeni-yeni nailiyyətlər arzulayıram!
