14 mart tarixində Beynəlxalq Qalereyada Binəqədi rayonu 333 saylı tam orta məktəbin 8-ci sinif şagirdi, istedadlı yeniyetmə rəssam, Qarabağ qazisi Kərəm Məcidovun qızı Günal Məcidsoyun “Konstitusiya və Suverenlik İli”nə həsr olunmuş “Vətənim Azərbaycandır” adlı ilk fərdi yaradıcılıq sərgisi təşkil olunub. Qeyd edək ki, sərginin layihə rəhbəri Aygün Əzizovadır.
Sərgidə 25 ədəd müxtəlif texnikalarda Ulu Öndər Heydər Əliyevin silsilə portretləri və 35 ədəd təbiət mövzulu əsərlər nümayiş etdirilib. Rəssam öz bacarığını həm portret, həm təbiət mənzərələri, həm də natürmort sahələrində uğurla təqdim edib.
Sərginin açılışında çıxış edən Beynəlxalq Qalereyanın direktoru Elnurə İsgəndərova yeniyetmə rəssam Günal Məcidsoyun illərdir peşəkarlığa doğru irəlilədiyini, əzmlə çalışaraq ölkədaxili və beynəlxalq sərgilərdə fəal iştirak etdiyini və uğur qazandığını vurğuladı.
Günalın anası Sevinc Məcidova, Beynəlxalq Qalereyanın əməkdaşlarına gözəl sərgi üçün təşəkkür etdi. O, qızının 5 yaşından rəsm çəkdiyini və müəllimlərinin onun rənglərin ahəngində mövzu axtarışlarına diqqət yetirdiklərini bildirdi. Sevinc Məcidova, Günalın bu sahədə gələcəkdə uğur qazanacağına inandıqlarını qeyd edib və bu gün də övladı ilə fəxr etdiyini söyləyib. O, həmçinin Günalın gələcəkdəki uğurları üçün ona uğurlar arzulayıb.
Sərgidə fəxri qonaq qismində iştirak edən ADRA-nın müəllimi Zinaida Mirzəzadə, Günal Məcidsoyun uğurlu bir gələcəyi olduğunu vurğulayıb və ona hədiyyə olaraq antik gümüş üzük təqdim edib. Gənc rəssamı Beynəlxalq Qalereya adından diplomla təltif edib.
Tədbirdən sonra xatirə fotoları çəkilib.
Aygün Oqtay,
Fotolar Camalındır
Operator: Xatirə Məmmədova
