“Türkiyədə keçirilən NATO sammiti Alyans daxilindəki fikir ayrılıqlarını aradan qaldırdı; Trampın Patriot hava hücumundan müdafiə sistemlərinin Ukraynada istehsalına lisenziya verməsi Rusiyanın gələcək taleyi ilə bağlı kritik nəticələr doğuracaq”.
Avropa.info xəbər verir ki, bunu Sosdem.az-a Milli Cəbhə Partiyasının (MCP) başqan müavini, siyasi şərhçi Vüqar Dadaşov deyib.
Analitik regional və qlobal təhlükəsizlik arxitekturasının dəyişməsini, həmçinin Vaşinqtonun Kiyevə yanaşmasındakı məcburi transformasiyanı diqqətə çatdırıb:
“Türkiyədə keçirilən NATO sammitinin yekunları Alyans daxilində son dövrlərdə yaranmış fikir ayrılıqlarının aradan qalxması və vahid mövqeyin bərpa olunması baxımından mühüm əhəmiyyət daşıyır. Rusiya-Ukrayna müharibəsi fonunda, xüsusilə də Donald Trampın yenidən hakimiyyətə qayıtmasından sonra NATO daxilində müəyyən fikir ayrılıqları, hətta Alyansın birliyi ilə bağlı narahatlıqlar açıq şəkildə özünü göstərirdi. Sammitin nəticələri göstərir ki, müttəfiqlər ümumi təhlükəsizlik prioritetləri ətrafında yenidən ortaq mövqe formalaşdırmağa nail olublar. Bu, ABŞ-ın NATO çərçivəsində daha koordinasiyalı və vahid yanaşmaya qayıtmasının əlamətidir.
NATO-nun və ABŞ-nin Ukraynaya münasibətinin dəyişməsinin başlıca səbəbi Ukraynanın nümayiş etdirdiyi ciddi müqavimət və əldə etdiyi real hərbi uğurlardır. Prezident Zelenskiyə və Ukraynaya nə qədər təzyiq göstərilməsinə baxmayaraq, Kiyev öz mübarizəsini dayandırmadı, əksinə, müqavimətini daha da gücləndirdi. Nəticədə həm hərbi əməliyyatlarda ciddi üstünlüklər qazandı, həm də müasir hərbi texnologiyalar sahəsində mühüm nailiyyətlər əldə etdi. Hazırda Ukraynanın müqaviməti və müharibəni Rusiya ərazisinə daşınması artıq təkcə Putinin hakimiyyəti üçün deyil, bütövlükdə Rusiyanın gələcəyi və hətta parçalanması baxımından ciddi təhlükə yaradır. Məhz bu reallıq fonunda ABŞ Ukraynaya dəstəyini artırır. Bu, artıq geosiyasi reallığın qəbul edilməsi və güc balansının dəyişdiyinin etirafıdır. Hətta bunu Trampa qarşı bir məcburiyyət hesab etmək olar”.
MCP rəsmisi hərbi ssenarilərin gələcək inkişaf xəttini, ABŞ-nin strateji lisenziya gedişini və Ukraynanın yeni beynəlxalq statusunu təhlil edib:
“Donald Trampın Patriot hava hücumundan müdafiə sistemlərinin Ukraynada istehsalına lisenziya verməsi də Rusiyanın gələcək taleyi ilə bağlı ciddi nəticələr çıxarmağa əsas verir. Bununla belə, hesab edirəm ki, proseslər hələ də dəyişə bilər. Vladimir Putinin hakimiyyətdən getməsi halında danışıqlar masası yenidən qurula və tərəfləri müəyyən dərəcədə qane edən nəticələr əldə etmək olar.
Ancaq artıq bir həqiqət dəyişməzdir: Ukrayna artıq diktə edən tərəf olduğunu sübut edib. Kiyev təkcə öz dövlətçiliyini deyil, həm də son dövrlərdə Avropanın təhlükəsizliyinin əsas sipərlərindən biri olduğunu bütün dünyaya nümayiş etdirir”.
