Milli Məclisin payız sessiyasının iş planı müzakirə olunarkən ölkədə gənc ailələrin sosial təminatı, uşaqların hüquqlarının qorunması və demoqrafik inkişafın dəstəklənməsi məsələsi parlamentin diqqət mərkəzinə gətirilib.

Avropa.info xəbər verir ki, Milli Məclisin iclasında Milli Cəbhə Partiyasının (MCP) başqanı, deputat Razi Nurullayev “Ailə, valideynlik və uşaqların hüquqlarının təminatı haqqında” yeni və kompleks qanun layihəsinin hazırlanmasını və parlamentin iş planına daxil edilməsini təklif edib.

“Övlad Sahibi Olmaq Bir Günlük Qərar Deyil”

Millət vəikili gənc ailələrin üzləşdiyi uzunmüddətli öhdəliklərə toxunaraq, dövlət dəstəyinin yalnız uşağın doğulduğu anla məhdudlaşmamalı olduğunu vurğulayıb:

“Gənc ailə üçün övlad sahibi olmaq bir günlük qərar deyil. Bu, ən azı 18-20 il davam edən böyük məsuliyyətdir. Ona görə də dövlətin ailənin yalnız uşağın doğulduğu anda deyil, bütün bu mərhələlər boyunca yanında olmasını vacib görürəm. Qabaqcıl dünya təcrübəsində də məsələyə yalnız pul ödənişi kimi deyil; mənzil, uşaq baxımı, valideynlərin əmək fəaliyyəti, təhsil və gələcək maliyyə təhlükəsizliyini əhatə edən kompleks sistem kimi yanaşılır.

Azərbaycanda bu istiqamətdə kifayət qədər dövlət dəstəyi, müavinətlər və sosial proqramlar mövcuddur. Lakin bu imkanlar müxtəlif qanunlarda və proqramlarda dağınıq şəkildə təqdim olunur ki, bu da vətəndaş üçün mürəkkəb görünür. Yanaşmamız belə olmalıdır: hüququn qanunda yazılması kifayət deyil, vətəndaş həmin hüquqdan real və rahat şəkildə istifadə edə bilməlidir. Məqsəd mövcud mexanizmləri vahid hüquqi çərçivədə toplamaq, sistemləşdirmək və yeni kompleks xidmətlər əlavə etməkdir”.

“Gənc Ailə Üçün Əsas Sual “Harada Yaşayacağıq?”dır”

MCP başqanı gənc ailələrin mənzil təminatı, ananın əmək bazarındakı mövqeyi və uşaqların gələcək inkişafı ilə bağlı strateji prioritetləri diqqətə çatdırıb:

“Bu gün bir çox gənc üçün artıq əsas sual ‘uşaq pulu nə qədər olacaq?’ deyil, ‘harada yaşayacağıq?’ sualıdır. Güzəştli ipoteka imkanlarının genişləndirilməsi, ilkin ödənişə dövlət dəstəyi və uşaqlı ailələr üçün əlavə mexanizmlər bu siyasətin bir hissəsi olmalıdır.

Digər mühüm məsələ uşaq baxımıdır. Elə şərait yaratmalıyıq ki, qadın ana olduğu üçün əmək bazarından kənarda qalmasın. Bağçaların əlçatanlığı, çevik iş imkanları və valideynlər üçün uyğun əmək şəraiti təmin edilməlidir. Təhsil və inkişaf imkanlarına yönələn dəstək ailəyə yalnız bugünkü xərcləri qarşılamaqda deyil, uşağın gələcəyini qurmaqda kömək etməlidir”.

“Demoqrafik Problemi İnzibati Çağırışlarla Həll Etmək Olmaz”

Parlamentari çıxışının sonunda dövlət-ailə münasibətlərində fəlsəfi yanaşmanın dəyişdirilməsinin vacibliyini qeyd edib:

“Ən vacibi budur: dövlət ailəyə ‘övlad sahibi olun’ deyən tərəf kimi yox, bu qərarın məsuliyyətini bölüşən tərəf kimi çıxış etməlidir. Gənc ailəyə deməliyik: siz ailə qurursunuzsa və övlad sahibi olmaq istəyirsinizsə, bu yolda tək deyilsiniz. Mənzil məsələsində, uşağın baxımında, təhsildə və əmək həyatında dövlət sizin yanınızdadır.

Çünki demoqrafik problemi inzibati çağırışlarla həll etmək mümkün deyil. İnsan gələcəyinə əmin olduqda, ailəsinin və övladının təhlükəsizliyini gördükdə daha inamlı qərar verir. Bu, yalnız demoqrafik siyasət deyil; insan hüquqları, ailənin sosial təminatı və Azərbaycanın gələcəyinə investisiyadır. Məqsədimiz daha təhlükəsiz, daha imkanlı və övladını gələcəyə inamla böyüdə bilən ailələr yaratmaqdır. Bu səbəbdən təklif edirəm ki, kompleks qanun layihəsinin hazırlanması payız sessiyasının iş planına daxil edilsin”.