Livan prezidenti Cozef Aunun Livanın baş naziri Navaf Salam və müvafiq nazirlərlə keçirdiyi görüşdə İrana uçuşların dayandırılmasının uzadılması qərara alınıb.
Avropa.info xəbər verir ki, Livan Rəyasət Heyətindən verilən açıqlamada bildirilib ki, toplantıda prezident Cozef Avn və baş nazir Salam, həmçinin müdafiə naziri Mişek Mnessa, xarici işlər naziri Yusuf Recci, daxili işlər naziri Əhməd əl-Haccar, ictimai işlər və nəqliyyat naziri Fayez Rasmani və hava limanının təhlükəsizlik komandiri Fadi Kefuri iştirak edib.
Görüşdə Beyrutdakı Rafik Həriri Beynəlxalq Hava Limanının təhlükəsizlik məsələsinin müzakirə edildiyi və mövzu ilə bağlı alınan qərarların açıqlandığı bildirilib.
Livan ordusunun hava limanı və ətrafının təhlükəsizliyi ilə bağlı səylərini təqdir etməklə yanaşı, hava limanı yolunun bağlanmasına dözülməməsi və ictimai əmlakın qorunması üçün lazımi tədbirlərin görülməsi qərara alınıb.
Qeyd olunub ki, xarici işlər naziri Recci Tehran və Beyrut arasında uçuşlar məsələsini müzakirə edəcək və İrandakı Livan vətəndaşlarının ölkəyə təxliyyəsi ilə bağlı diplomatik təmaslar aparacaq.
Bildirilib ki, ictimai işlər və nəqliyyat naziri Rasmaniyə Livan və İran arasında uçuşların dayandırılması müddətini uzatmaq tapşırılıb.
Bəyanatda Livan və İran arasında uçuşların nə qədər müddətə dayandırılacağı ilə bağlı hər hansı məlumat yer almayıb.
Livanda Hizbullah tərəfdarları hava limanında etiraz aksiyası keçiriblər
Fevralın 13-də Hizbullah tərəfdarları Tehrandan Beyruta uçuşlara icazə verilmədiyini əsas gətirərək təkərləri yandırıb və Beyrutdakı Rəfik Həriri Beynəlxalq Hava Limanına gedən yolu bağlayıblar.
Livan Mülki Aviasiya Baş İdarəsindən verilən yazılı açıqlamada , sərnişinlərin, təyyarələrin və hava məkanının təhlükəsizliyini təmin etmək üçün tədbirlərin görüldüyü və İrandan gələnlər də daxil olmaqla bəzi uçuşların “müvəqqəti olaraq 18 fevral 2025-ci il tarixinə qədər təxirə salınacağı” bildirilib.
Bildirilib ki, fevralın 14-ü axşam saatlarında hava limanı yaxınlığında Hizbullah tərəfdarları Birləşmiş Millətlər Təşkilatının Livandakı Müvəqqəti Sülh Qüvvələrinin (UNIFIL) maşınına və şəxsi heyətinə hücum edərkən sülhməramlı qüvvələrin komandir müavini yaralanıb.
Livanda dünən hava limanı yolunda əsgər və hərbi maşınlara edilən hücumlarda 3-ü zabit olmaqla 23 əsgər yaralanıb.
