İspaniyanın cənubundakı Qranada əyalətində baş verən üç yeni zəlzələ binalara ziyan vurub. Bəzi muzeylər və idman obyektləri, o cümlədən Əlhambra Sarayı kompleksi ehtiyat tədbiri olaraq bağlansa da, turistlərin ziyarətinə məhdudiyyətlər qoyulub.
Avropa.info xəbər verir ki, Milli Coğrafiya İnstitutu (IGN) çərşənbə axşamı qeydə alınan zəlzələlərin hər birinin maqnitudasının 4,0 baldan yuxarı olduğunu açıqlayıb. Əndəlus bölgəsinin fövqəladə hallar rəsmisi Antonio Sanz ən azı üç nəfərin yüngül xəsarət aldığını, yaralı uşaqlardan birinin isə xəstəxanaya yerləşdirildiyini bildirib.
Alhambra Sarayında ziyarət məhdudiyyətləri
Ən son təkanlar şənbə günü Qranada şəhərində baş verən 5,0 bal gücündə zəlzələdən sonra baş verib.
Şənbə günü baş verən zəlzələdə tarixi quruluşa heç bir ziyanın olmadığı açıqlansa da, çərşənbə axşamı baş verən zəlzələlərdən sonra səlahiyyətlilər İslam memarlığının ən mühüm əsərlərindən olan Əlhambra Sarayı kompleksinin bəzi hissələrinə turistlərin girişini dayandırıb.
Qranada əyalət rəhbərliyindən verilən açıqlamada, inzibati binaların, muzeylərin və idman obyektlərinin bağlandığı, əsas sağlamlıq mərkəzlərinin isə açıq saxlandığı açıqlanıb.
Qranada metrosu ehtiyat tədbiri olaraq qatarın sürətini saatda 30 kilometrə endirərkən, şəhərdəki bəzi otellər boşaldılıb.
Ən böyük zəlzələ 4,7 bal gücündə olub
Çərşənbə axşamı baş verən zəlzələlərin ən böyüyü saat 10.37-də Qranada şəhər mərkəzindən 10 kilometr cənubda yerləşən Qocar qəsəbəsində qeydə alınıb.
Bildirilib ki, 4,7 bal gücündə bu zəlzələ yer səthinə yaxın dərinlikdə baş verib və ətraf yaşayış məntəqələrində intensiv hiss olunub.
Qocarda baş verən zəlzələdən sonra rayonda qısa fasilələrlə daha iki yüngül zəlzələ baş verib.
