Fransa prezidenti Emmanuel Makronun ev sahibliyi ilə Avropanın aparıcı liderlərinin iştirakı ilə Ukrayna ilə bağlı fövqəladə təhlükəsizlik sammiti başlayıb.
Avropa.info xəbər verir ki, Paytaxt Parisdəki Yelisey sarayında başlayan Ukrayna ilə bağlı qeyri-rəsmi təhlükəsizlik sammitində Almaniya kansleri Olaf Şolz, İngiltərə baş naziri Keir Starmer, İtaliyanın baş naziri Giorgia Meloni, Polşanın baş naziri Donald Tusk, İspaniyanın baş naziri Pedro Sançes, Hollandiya baş naziri Dik Schoof və Danimarka baş naziri Mette Frederiksen iştirak edib.
Sammitdə həmçinin Avropa İttifaqı (Aİ) Şurasının sədri Antonio Kosta, Aİ Komissiyasının sədri Ursula fon der Leyen və NATO-nun baş katibi Mark Rutte iştirak ediblər .
Prezident Makron və ABŞ prezidenti Donald Trampın sammitdən bir müddət əvvəl telefonla danışdığı mətbuata bildirilsə də , Yelisey Sarayından hələlik görüşlə bağlı açıqlama verilməyib.
Rusiya və ABŞ arasında Ukraynada sülhün əldə edilməsinə dair diplomatik danışıqların artdığı bir vaxtda Avropa dövlətləri “Ukraynada sülhün Avropasız əldə oluna bilməyəcəyini” iddia edirlər.
Bu kontekstdə Parisdə Avropanın aparıcı dövlətlərinin iştirakı ilə təhlükəsizlik sammiti keçirilir.
Digər tərəfdən, ABŞ və Rusiyanın yüksək səviyyəli rəsmilərinin Rusiya-Ukrayna müharibəsi ilə bağlı sabah Səudiyyə Ərəbistanında görüşəcəyi bildirilib.
ABŞ prezidenti Donald Tramp Rusiya prezidenti Vladimir Putinlə “çox yaxında” görüşəcəyini bildirib və Rusiya-Ukrayna müharibəsini dayandırmaq istədiklərini əlavə edib.
