Bakı şəhərində nəqliyyat sıxlığı və tıxac problemi gündəlik həyatın ən ciddi çətinliklərindən birinə çevrilib. Səhər və axşam pik saatlarında paytaxtın əsas nəqliyyat arteriyalarında hərəkət etmək sərnişinlər üçün vaxt və enerji itkisi yaratdığı bir vaxtda, metropoliten zəncirində aparılan təmir işləri vəziyyəti daha da mürəkkəbləşdirib.

Avropa.info xəbər verir ki, Bunu Sosdem.az-a Milli Cəbhə Partiyasının (MCP) başqan müavini, deputat Razi Nurullayevin köməkçisi Ehtiram Mehtiyev metroda aparılan yenidənqurma işlərinin sərnişinlər üçün yaratdığı əlavə maliyyə və logistik çətinliklərlə bağlı danışarkən deyib.

Başqan müavini xüsusilə “28 May” stansiyasından “Elmlər Akademiyası” istiqamətində hərəkət edən sərnişinlərin üzləşdiyi problemə toxunaraq, alternativ olaraq ayrılmış ekspres avtobusların ödənişli olmasını ədalətsiz yanaşma kimi qiymətləndirib:

“Metroda təmir işlərinin aparılması anlaşılandır və infrastructure-un yenilənməsi üçün vacibdir. Amma sərnişin metrodan istifadə edə bilmədiyi üçün alternativ nəqliyyata yönləndirilirsə, həmin ekspres avtobuslar təmir müddətində pulsuz olmalıdır. Vətəndaş öz iradəsindən asılı olmayan səbəbdən marşrutunu dəyişməyə məcbur qalırsa, niyə ikiqat nəqliyyat haqqı ödəməlidir?”

MCP rəsmisi vurğulayıb ki, gün ərzində metrodan yüz minlərlə insan istifadə edir və kifayət qədər ödəniş toplanır:

“Buna görə də təmir dövründə ortaya çıxan fəsadların və maliyyə xərclərinin sərnişinlərin cibinə yüklənməsi düzgün deyil. Bu vəziyyət xüsusilə hər gün dərsə gedən tələbələr, işə tələsən az təminatlı vətəndaşlar və gündəlik gediş-gəliş edən insanlar üçün ciddi əlavə xərc deməkdir. Sadə və sosial ədalətə söykənən bir yanaşma tətbiq olunmalıdır: metroda təmir başa çatanadək həmin istiqamətdə fəaliyyət göstərən ekspres avtobuslar pulsuz xidmət göstərməlidir. Təmirin yarattığı nəqliyyat sıxlığının üstünə bir də maliyyə yükü əlavə edilməməlidir”.