ABŞ Prezidenti Donald Tramp 2025-ci il ərzində öz administrasiyasının tarif siyasətinin səbəb olduğu kotirovkaların kəskin azalması dövründə aparıcı texnoloji korporasiyaların qiymətli kağızlarını alıb.
Avropa.info xəbər verir ki, bu barədə yerli “CNBC” telekanalı məlumat yayıb.
Məlumata görə, adi günlərdə Ağ Evin rəhbəri gün ərzində səhm almaq üzrə orta hesabla təxminən 62 əməliyyat həyata keçirib, lakin ötən ilin 8 aprelində bu cür tranzaksiyaların sayı kəskin artaraq 327-yə çatıb. “CNBC” diqqətə çatdırıb ki, alıcılıq fəallığındakı bu sıçrayış yüksək gömrük tariflərinin tətbiqi üzrə genişmiqyaslı planın anons edilməsi ilə stimullaşdırılan dörd günlük kotirovka çöküşünün başa çatması ilə üst-üstə düşüb.
Trampın həmin gün qiymətli kağızlarını aldığı korporasiyaların siyahısına “Apple”, “Alphabet”, “Amazon”, “Microsoft” və “Nvidia” daxil olub.
2025-ci ilin aprelində Amerika lideri 185 dövlət və ərazidən gələn mallara gömrük rüsumlarının tətbiq edilməsi barədə sərəncam verib. Sonradan prezident bir sıra ölkələrdən gələn idxal məhsulları üçün tarif dərəcələrinə dəfələrlə düzəlişlər edib. 20 fevral 2026-cı ildə ABŞ Ali Məhkəməsi qərara alıb ki, beynəlxalq fövqəladə hallar zamanı iqtisadi tədbirlər haqqında qanuna istinadən Trampın idxal rüsumları prezident səlahiyyətlərinin aşılmasıdır.
Daha əvvəl “The Washington Post” nəşri məlumat vermişdi ki, Trampın şəxsi sərvətinin 2025-ci il ərzində artması bütün Amerika rəhbərləri arasında misilsiz olub. Dövlət başçısının son maliyyə bəyannaməsinə əsasən, onun gəlirləri 2,2 milyard dollardan yuxarı həddə çatıb ki, bu da, əsasən, kriptovalyuta aktivlərinə və onlarla bağlı layihələrə qoyulan investisiyalar sayəsində mümkün olub.
