“Sahibkar cinayətkar kimi yox, iqtisadiyyatın dayağı kimi görülməlidir; Valyuta risklərini azaldan bu addım mühümdür, lakin bank kreditlərinə çıxış, ağır girov şərtləri və icazələrdəki süründürməçilik hələ də parlament səviyyəsində həllini gözləyən fundamental problemlərdir”.

Avropa.info  xəbər verir ki, Milli Məclisin plenar iclasında çıxış edən Milli Cəbhə Partiyasının (MCP) başqanı, deputat Razi Nurullayev ölkədə biznes mühitinin liberallaşdırılması, Cinayət Məcəlləsində edilən son mühüm dəyişikliklər və sahibkarların yerlərdə qarşılaşdığı bürokratik əngəlləri parlament tribunasından kəskin şəkildə dilə gətirib.

“Müasir Biznes Bir Ölkəyə Sığmır”

Milllət vəkili parlament tribunasından Cinayət Məcəlləsinin 208-ci maddəsinin (“Xarici valyuta vəsaitlərini xaricdən qaytarmama”) ləğvinin sahibkarlığın inkişafı baxımından tarixi hadisə olduğunu vurğulayıb:

“Müasir biznes artıq yalnız bir ölkə daxilində aparılmır. Sahibkar mal ixrac edir, xaricdə tərəfdaşla işləyir, logistika xərci ödəyir, yeni bazara daxil olur və bəzən vəsaiti xaricdə saxlamaq məcburiyyətində qalır ki, növbəti müqaviləni yerinə yetirə bilsin. Belə vəziyyətdə hər gecikməni və ya hər maliyyə hərəkətini dərhal cinayət müstəvisinə çəkmək sahibkarın riskini artırır, onun qərarvermə azadlığını məhdudlaşdırırdı. Bu baxımdan 208-ci maddənin ləğvi sahibkarlığın və sahibkarın inkişafı baxımından çox mühüm hadisədir. Bu dəyişiklik yalnız bir maddənin ləğvi kimi yox, sahibkara münasibətin yumşalması kimi qəbul edilməlidir. Əgər pozuntu varsa, ilk növbədə maliyyə nəzarəti, vergi mexanizmləri və inzibati tədbirlər işləməlidir. Cinayət məsuliyyəti isə ən son vasitə olmalıdır”.

“Bank Kreditləri və Ağır Girov Şərtləri Biznesi Sıxır”

Deputat dövlətin son illərdə həyata keçirdiyi müsbət islahatları və kənd təsərrüfatına dəstəyi təqdir etməklə yanaşı, real sektorda hələ də həllini tapmayan problemləri hökumətin diqqətinə çatdırıb:

“Dövlət son illərdə sahibkarlığın inkişafı üçün ciddi addımlar atıb. Vergi inzibatçılığının sadələşdirilməsini, biznesə münasibətdə elektron xidmətlərin genişləndirilməsini, qeyri-neft ixracının təşviqini, KOB-lara dəstək mexanizmlərini və kənd təsərrüfatının inkişafı ilə bağlı 6 milyardlıq proqramın qəbul edilməsini müsbət qiymətləndirirəm. Bununla belə, sahibkar hələ də xeyli problemlə üz-üzədir: bank kreditlərinə çıxış çətindir, faizlər yüksəkdir, girov tələbləri ağırdır. Bəzi yoxlamalar və icazə prosedurları biznes üçün əlavə yük yaradır, məhkəmə müdafiəsinə inam hər zaman yetərli deyil, region sahibkarı ilə paytaxt sahibkarının imkanları eyni səviyyədə deyil”.

“Sənədləşmə Tam Rəqəmsallaşmalıdır”

MCP lideri biznes obyektlərinin yaradılması zamanı icra strukturlarının yaratdığı süni əngəlləri tənqid edərək qanunvericilik səviyyəsində islahat təklifləri irəli sürüb:

“Təcrübədən görürük ki, sahibkarlığın inkişafı üçün yalnız cəza mexanizmlərini yumşaltmaq kifayət deyil. Biznes obyektlərinin yaradılması və genişləndirilməsi zamanı sənədləşmə prosesi hələ də şəffaf və sürətli deyil. ‘Bir pəncərə’ sistemi formal olaraq mövcuddur, amma sahibkar yenə də müxtəlif qurumların qapısını döyməli olur. Torpaq, çıxarış, təyinat, tikinti icazəsi, kommunikasiya, yanğın və sanitariya rəyləri bəzən aylarla, hətta illərlə uzanır. Sahibkar investisiya qoymaq, iş yeri yaratmaq istəyir, amma sənəd yükü onun qarşısında maneəyə çevrilir. Ona görə də sənədləşmə prosesi tam rəqəmsallaşmalı, müddətlər qanunla məhdudlaşdırılmalı və hər qurumun məsuliyyəti aydın müəyyən edilməlidir. Avropa ölkələrində, Gürcüstan və Qazaxıstanda riskəsaslı nəzarət modelinə üstünlük verilir. 208-ci maddənin ləğvi müsbət addımdır, lakin real effekt o zaman olacaq ki, dövlət qurumları biznesə tərəfdaş kimi yanaşsın. Sahibkar nə qədər rahat nəfəs alarsa, ölkə iqtisadiyyatı da bir o qədər güclü olar”.