Dostları mərhum Əməkdar artist Cabir İmanovun 50 illik yubileyi münasibəti ilə paylaşımlar ediblər.
Avropa.info xəbər verir ki, Xalq artisti, Xəzər Media Mərkəzinin Baş direktoru Murad Dadaşov mərhum dostu ilə şəklini paylaşaraq “Ürəyim Cabir. Cabirsizliyin ilk acı ili” deyə yazıb.
Əməkdar artist Bəhram Bağırzadə isə mərhum həmkarını bu sözlərlə yad edib:
“Əziz Cabir, bu gün sənin 50 yaşın tamam olacaqdı. Biz bu günü çoxdan gözləyirdik, bir araya gəlməyi, səni qucaqlamağı, gözəl sözlər deməyi, birlikdə gülməyi, xatirələrimizi yada salmağı və sənin gözəl yubileyini qeyd etməyi arzulayırdıq. Amma tale başqa cür yazdı… Sənin aramızdan ayrılmağının üzərindən demək olar ki, bir il keçir.
Deyirlər ki, zaman hər yaranı sağaldır. Amma bu aylar ərzində mən bir şeyi başa düşdüm: zaman əziz insanların xatirəsini silmir. O, sadəcə, insanı bu ağrı ilə yaşamağa öyrədir. Mən səni çox darıxmışam, Cabir. Sənin səsin, gülüşün, məsləhətlərin, müdrikliyin və yanında olduğum zaman hiss etdiyim o rahatlıq mənə çox çatmır.
Sən mənim üçün sadəcə dost deyildin. Sən mənim qardaşım idin. Sən elə bir insan idin ki, mən həyatımın ən çətin anlarında da sənə zəng edə bilərdim, istər sevincdə, istər kədərdə. Sən həmişə doğru söz tapar, dinləyər, anlayar, dəstək olar və çıxış yolu görünməyəndə belə onu göstərərdin.
Sənin istedadının sərhədi yox idi. Səhnədə insanlara sevinc və təbəssüm bəxş edirdin, peşəndə vicdanla və ləyaqətlə xidmət edirdin, həyatda isə saysız-hesabsız bacarıqlarınla hamını heyrətləndirirdin. Musiqilər yazırdın, şeirlər yaradırdın, paltar tikə bilirdin, hətta KVN-in “Bakı oğlanları” komandasının bütün üzvlərinin saçını kəsə bilirdin. Elə bil ki, sənin əl atdığın hər bir işdə qəlbinin izi qalırdı.
Bilirsən, Cabir, ən çətini odur ki, artıq sənə zəng edib səsini eşitmək, o doğma “alo”nu dinləmək, təbəssümünü görmək mümkün deyil. Amma eyni zamanda anlayıram ki, sən heç vaxt tam getmədin. Sən bizim xatirələrimizdə, söhbətlərimizdə, zarafatlarımızda və qəlbimizdə qoyduğun böyük sevgi və minnətdarlıq hissində yaşamağa davam edirsən.
Mənə çox ağırdır və bu ağrı yəqin ki, ömrümün sonuna qədər mənimlə qalacaq. Çünki sənin kimi insanları unutmaq mümkün deyil. Mən hər Allahın günü səninlə qəlbimdə danışır, səninlə…”.
Əməkdar artist Abbas Bağırov isə illər ərzində C.İmanovla çəkilən görüntülərini yayımlayaraq bunları yazıb:
“Bu gün mənim çox əziz dostumun, heç vaxt unutmayacağım, qəlbimdə daim yaşayacaq bir insanın, Cabir İmanovun 50 illik yubiley günüdür.
Kaş ki, bu günü onunla birlikdə qeyd edə biləydik… Kaş ki, bu gün onun qarşısında dayanıb ad gününü şəxsən təbrik edə biləydim. Amma həyatın yazdığı tale fərqli oldu…
Cabirlə tanış olduğum gündən bu yana artıq 30 ilə yaxın bir zaman keçir. Bu, heç də az müddət deyil. Bu illər ərzində onunla bağlı o qədər gözəl xatirələrim var ki, onları danışmaqla bitirmək mümkün deyil.
“Məhəllə” filminin çəkilişinə dəvət alanda Cabirin o qədər səmimi, o qədər pozitiv və enerji dolu yanaşması oldu ki, heç düşünmədən həmin təklifi qəbul etdim. Və yaxşı ki, etdim. Çünki o gündən sonra mən Cabir İmanovu daha yaxından tanımağa başladım. Onun dostluğa sədaqəti, vəfası, insanlara olan diqqəti, hörməti və sevgisi sözlə ifadə olunacaq qədər sadə deyildi. O, dostluğun nə olduğunu öz davranışları ilə göstərən insanlardan idi. Onun haqqında saatlarla danışmaq olar, amma yenə də deyiləcək sözlər bitməz.
Bəzən düşünürəm ki, Cabirin mənfi xüsusiyyəti nə idi? Və hər dəfə eyni cavabı tapıram: onun mənfi xüsusiyyəti yox idi. Çünki o, daxilən gözəl, ürəyi təmiz, insanlara sevgisi sonsuz olan bir insan idi.Onunla yol yoldaşı olmaq böyük xoşbəxtlik idi. İnsan onunla kilometrlərlə yol getməkdən yorulmazdı. Onu tanıyan da, tanımayan da bir dəfə görüşəndən sonra onu yenidən görmək istəyərdi. Çünki Cabir İmanov insanın qəlbində iz qoymağı bacaran nadir insanlardan idi. Təəssüf ki, bu gün o, aramızda deyil. Amma belə insanlar heç vaxt unudulmurlar. Onlar fiziki olaraq bu dünyadan köçsələr də, xatirələrdə, qəlblərdə və dualarda yaşamağa davam edirlər.
Bu gün sənin 50 illik yubileyindir. Bu yubiley sənsiz qeyd olunur. Amma bil ki, sən bizim üçün həmişə yaşayacaqsan. Sənin dostluğun, xatirələrin, gülüşün və gözəl ürəyin daim bizimlə olacaq.
Ruhun şad olsun, əziz dostum. Səni sevənlərin qəlbində həmişə yaşayacaqsan”.
Qeyd edək ki, C.İmanov ötən il ürəktutmasından vəfat edib.
