Kolumbiyanın cənub-qərbində 600 nəfərlik qrup tərəfindən girov götürülən 45 əsgər azad edilib.
Avropa.info xarici KİV-ə istinadən xəbər verir ki, Kolumbiya ordusunun yaydığı açıqlamada Cauca vilayətinin El Tambo bölgəsi yaxınlığında yerləşən Los Tiqres ərazisində əməliyyatdan qayıdan zaman təxminən 600 nəfərlik bir qrup tərəfindən girov götürülən 45 əsgərin azad olunduğu bildirilib.
Kolumbiya Prezidenti Qustavo Petro “X” sosial media platformasındakı hesabında paylaşım edərək əsgərləri girov götürən qruplara sərt reaksiya göstərib.
Petro ölkənin cənub-qərb bölgəsində əməliyyatların davam edəcəyini vurğulayıb.
“Əsgərlərə hücum edilən bölgələrdə hava əməliyyatları keçiriləcək, lakin mülki şəxslərə zərər verilməyəcək. Məqsəd xalqı mafiyalardan qorumaq və ölkə torpaqlarını təmizləməkdir. Milli torpaqları mafiyalardan təmizləmək Prezidentin borcudur”, – deyə o bildirib.
Prezident ordunun qanunsuz silahlı qruplara qarşı əməliyyat keçirdiyi bölgələrdəki yerli əhaliyə də səslənib.
“Artıq kənd təsərrüfatı məhsullarını sülh yolu ilə dəyişməyin vaxtıdır. Əsgərləri azad edin, onlar sizin övladlarınız ola bilər. Kolumbiyanın övladları bir-birinə sarılmalıdır. Dialoq komissiyası hazırdır, bu Prezidentin sözüdür”, – Petro qeyd edib.
Yerli mətbuatda yer alan xəbərlərə görə, əsgərlər əməliyyatdan qayıdarkən Cauca vilayətinin El Tambo bölgəsi yaxınlığında 600 nəfərlik bir qrup tərəfindən qarşılanaraq saxlanılıb.
Ordudan verilən açıqlamada 45 əsgərin mülki vətəndaşlar tərəfindən saxlanıldığı təsdiqlənib və hadisə ilə bağlı araşdırma başlandığı bildirilib.
Yerli mətbuatın yaydığı məlumata əsasən, hadisəyə görə məsuliyyət daşıyanların “Carlos Patino” adlı silahlı qrupun təsiri altındakı mülki şəxslər olduğu iddia edilir.
Bölgədə uzun müddətdir ki, narkotik qaçaqmalçılığına qarşı əməliyyatlar aparan təhlükəsizlik qüvvələri daha əvvəl də oxşar hallarla üzləşmişdi.
Əsgərlərin azad olunması üçün Ombudsmanlıq Qurumu və vətəndaş cəmiyyəti təşkilatlarının prosesə daxil olacağı gözlənilir.
