Ana və Vətən – bu iki kəlmə birləşdikdə ülvi, müqəddəs bir anlayış yaranır: Ana Vətən!
Bu söz bizə nə qədər əzizdirsə, bir o qədər də doğmadır; nə qədər doğmadırsa, bir o qədər də əzizdir. Ana Vətən – öz doğmalığı və əzizliyi ilə ruhumuzun qidasıdır.
Ana torpaq bizi qoynuna alaraq səmimi ürək açıqlığı ilə yer verib, əlimizdən tutub böyüdüb. O, naz-nemətini, bar-bərəkətini, havasını, suyunu bizdən əsirgəməyib. Biz bu iki sözü – Ana və Vətəni sevirik. Hər ikisinə qəlbən, ruhən bağlıyıq. Bu bağlılıq möhkəmdir, qırılmazdır. Bu bağ polad kimi əyilməz, dağlar qədər vüqarlı, bulaq suyu kimi dupduru, saf və təmizdir. Məhz buna görə də sevgimizi birləşdirib böyük qürur və iftixarla deyirik: Ana Vətən!
Vətəni sevməmək mümkün deyil. Biz Ana Vətəni, ana torpağı qədər müqəddəs başqa heç nə ilə müqayisə etmirik. Bu torpaqda yaşadığımıza, var olduğumuza görə biz ona borcluyuq. Doğma, əziz Vətən həm də bizim anamızdır. Vətəni də, ananı da qorumalıyıq. Onları qoruduqca, onlara sevgimiz daha da artır.
Vətən sevgisi bizə mətinlik, məğrurluq, mübarizlik verir. Vətən qorunduqca vətəndir; qorunduqca daha çox sevilir. Əsrlər boyu xalqımız vətən sevgisi ilə yaşayıb, torpağını göz bəbəyi kimi qoruyub. Cəsur, qəhrəman, igid oğullar daim vətənin, torpağın, yurdun keşiyində dayanıb, düşmənə keçilməz sipər olublar. Onlar torpaq uğrunda döyüşüblər, vuruşublar, çarpışıblar. Torpaq yalnız qanla suvarıldıqda Vətən olur.
Bu müqəddəs vətənin böyük, şərəfli bir adı var: Azərbaycan!
Mənim Ana Vətənim, Ata Yurdum Azərbaycanın dilbər guşəsi olan, təbiət möcüzəsi sayılan, gözəl məkanı ilə seçilən Zəngəzurun Gorus mahalıdır.
Vətənim Gorus dəfələrlə işğallara məruz qalıb. Bunun səbəbi onun gözəlliyi, ecazkar təbii sərvətləri və əlverişli coğrafi mövqeyidir. Gorusun zəngin və əlverişli iqlimi bu mahalın böyük sərvətlərə malik olmasına səbəb olub.
Ana yurdum Gorus keşməkeşli bir tarix yaşayıb. Bu gün də onun üzərində qara buludlar tam çəkilməyib. Azərbaycanın qəlbi Zəngəzur dərdi ilə yaralıdır. Lakin bu dərdi çözəcək mətin Sərkərdəmiz, qəhrəman və qeyrətli oğullarımız vardır. Başda Ali Baş Komandanımız olmaqla, cəsur Azərbaycan övladları və bütövlükdə millətimiz tezliklə öz doğma elinə, obasına – Ana Vətəninə qovuşacaq.
Azərbaycan xalqının tarixi onun azadlıq və xoşbəxtlik uğrunda mübarizə tarixidir. Bu xalqın mübarizəsi və qəhrəmanlığı tarix boyu təsvir və tərənnüm edilib. Tarixə nəzər saldıqda Ana Vətən və torpaq uğrunda döyüşən qəhrəmanlarımızı görürük. İllər keçsə də, tarix və tarixi hadisələr bu günə şahidlik edir. Bu mənada Azərbaycan xalqının qürur hissi keçirməyə, başını uca tutmağa tam mənəvi haqqı var.
Əgər bu gün torpaqlarımızda rahat yaşayırıqsa, bunu şəhidlərimizə borcluyuq. Əmin olun ki, əgər düşmənə qarşı qorxaqcasına davranan bir xalq olsaydıq, nə bu torpaqlarda qalardıq, nə də müstəqil dövlətə sahib olardıq.
Millətimizin yaşamasını və gələcək nəsillərə çatmasını təmin edən şəhidlərimiz heç bir qarşılıq gözləmədən bu fədakarlıqları ediblər. Onlar yalnız Ana Vətən uğrunda canlarını fəda ediblər.
Yuxarıda qeyd etdiyim kimi, mənim Ana Vətənim Zəngəzur mahalının Gorus rayonudur. Gorus rayonunun tarixən azərbaycanlıların yaşadığı bu kəndləri özünəməxsusluğu ilə seçilir. Bu kəndlər Şurnuxu, Ağbulaq, Qurdqalaq, Şahverdilər, Şamsız kəndləridir. Bu kəndlər əsrlər boyu yalnız azərbaycanlılara məxsus olub.
Adlarını çəkdiyim bu kəndlərin qəhrəman oğulları müharibə başlayandan etibarən torpaqlarımızın qorunması uğrunda mərdliklə döyüşüb, torpaq uğrunda canlarını fəda ediblər. Onlara cəsarət verən və sıralarını möhkəmləndirən Vətən və xalq sevgisi idi.
Bəli, bu beş kəndin də şəhidləri var. Biz onları Gorus Şəhidləri adı ilə əbədiləşdirib, bir təsəlli olaraq, xatirələrinin unudulmaması üçün Zəngəzurun giriş qapısı olan Şurnuxu kəndinin girişində şəkillərini yerləşdirdik.
Onlara dönə-dönə minnətdarlığımızı bildiririk. Ruhları qarşısında baş əyirik.
Natəvan Ağayeva
