Xarici İşlər Nazirliyi Azərbaycan və Ermənistan arasında davamlı sülhün bərqərar olması istiqamətində əldə olunan irəliləyişdən və bununla bağlı Vaşinqtonda ifadə olunan iradədən məmnunluğunu ifadə edib.
Avropa.info xəbər verir ki, Türkiyə Xarici İşlər Nazirliyi Azərbaycan və Ermənistan arasında sülh prosesi ilə bağlı yazılı açıqlama yayıb.
“Biz Azərbaycan və Ermənistan arasında davamlı sülhün bərqərar olunması istiqamətində əldə edilən irəliləyişdən və bu gün Vaşinqtonda bununla bağlı ifadə olunan iradədən məmnunuq”, – deyə bəyanatda bildirilir.
Bəyanatda beynəlxalq münaqişələrin və böhranların getdikcə şiddətləndiyi bir vaxtda atılan bu addımın regional sülhün və sabitliyin təmin edilməsində son dərəcə mühüm hadisə olduğu vurğulanıb və ABŞ administrasiyasının prosesə verdiyi töhfələrə görə minnətdarlıq ifadə edilib.
Bəyanatda Cənubi Qafqaza sülh və firavanlıq gətirmək üçün tarixi fürsətdən istifadə edildiyi qeyd edilərək, “Türkiyə olaraq bu fürsətin reallaşdırılması üçün göstərilən səylərə töhfə verməyə davam edəcəyik və Azərbaycanın sədaqətli səylərini dəstəkləyəcəyik” ifadə edildi.
Azərbaycan prezidenti İlham Əliyev və Ermənistanın baş naziri Nikol Paşinyan ABŞ prezidenti Donald Trampın ev sahibliyi ilə Ağ Evdə keçirilən üçtərəfli sammitin yekunları üzrə birgə bəyannamə imzalayıblar.
