Birləşmiş Millətlər Təşkilatının Təhlükəsizlik Şurası (BMT TŞ) bazar günü İsrailin Qəzza şəhərini işğal etmək qərarını müzakirə edəcək.
Diplomatik mənbələrdən əldə edilən məlumata görə, fövqəladə sessiyanın vaxtı dəyişdirilib.
Avropa.info xəbər verir ki, bu günə planlaşdırılan sessiya avqustun 10-u bazar gününə keçirilib.
Yerli vaxtla saat 10:00-da keçirilməsi planlaşdırılan sessiyanın niyə başqa vaxta keçirildiyi açıqlanmayıb.
İsrail hökumətinin Qəzza şəhərini işğal etmək qərarından sonra , ABŞ və Panama istisna olmaqla, BMT Təhlükəsizlik Şurasının bütün üzvləri iclas tələb edib .
ABŞ isə görüşün baş tutmamasında israr edib.
İsrail Təhlükəsizlik Kabineti cümə axşamı axşam Qəzza zolağının şimalında yerləşən Qəzza şəhərinin işğalı planını təsdiqləyib.
İsrailin baş naziri Benyamin Netanyahu Nazirlər Kabinetinin iclasından əvvəl Fox News-a verdiyi müsahibədə “bütün Qəzzanı nəzarətə götürməyi” hədəflədiklərini deyib.
