ABŞ Prezidenti Donald Trampın 2024-cü ildə keçirilən xüsusi ianə tədbirində etdiyi çıxışın səs yazısı ortaya çıxıb.
Avropa.info xəbər verir ki, CNN-in əldə etdiyi səs yazısında Tramp Rusiya prezidenti Vladimir Putini Ukraynanı işğal edəcəyi təqdirdə, Moskvanı bombalamaqla hədələdiyini bildirib.
Tramp səs yazısında Putinin bu təhdidə əvvəlcə tam olaraq inanmadığını, lakin məsələni ciddi qəbul etdiyini, bu mövqeyinin Rusiyanın geri çəkilməsində təsirli olduğunu iddia edib.
Eyni tədbirdə Trampın Çin lideri Si Cinpinə də bənzər xəbərdarlıq etdiyi qeyd olunub.
Tramp bildirib ki, əgər Çin Tayvana hərbi müdaxilə etsəydi, “Pekini bombalamaqla” hədələyib və bu sərt mövqeyin hər iki lideri çəkindirdiyini deyib.
Tramp qlobal gərginliklərin əsas məsuliyyətinin Co Baydenin rəhbərlik etdiyi administrasiyanın üzərində olduğunu iddia edib. O, öz prezidentliyi dövründə bu kimi təhdidlərlə böyük müharibələrin qarşısını aldığını deyərək, hazırkı böhranların Baydenin xarici siyasətdəki zəifliyindən qaynaqlandığını bildirib.
Səs yazısında Trampın yəhudi seçicilərlə bağlı diqqətçəkən ifadələri də yer alıb. “Əgər Baydenə səs verirsinizsə, deməli, özünüzə nifrət edirsiniz,” – deyə Tramp bildirib və Respublikaçıların İsrailə dəstəyinin daha güclü olduğunu vurğulayıb.
Tramp universitetlərdə keçirilən Fələstin tərəfdarı etirazları “ölkədən deportasiya edilməli olan” hərəkətlər kimi qiymətləndirib, sosial yardım alan seçiciləri tənqid edib və miqrasiya siyasətində daha sərt addımlar atılmalı olduğunu bildirib.
Kremlin sözçüsü Dmitri Peskov isə bu iddiaları təkzib edib. “Bu cür xəbərlərin çoxu əsassızdır. Təəssüf ki, Qərb mediasında bir çox saxta xəbər dolaşır”, – deyə o bildirib.
