Ağsuda sel ekskavatoru aşırıb. Hadisə nəticəsində 1 nəfər ölüb, 3 nəfər yaralanıb. Hadisə bu gün rayonun Kalva kəndi ərazisində qeydə alınıb.
Avropa.info AZƏRTAC-a istinadən xəbər verir ki, ilkin məlumatlara görə, ərazidə yol-təmir işləri ilə məşğul olan işçilər yağışın başlamasını müşahidə edərək təhlükəsizlik məqsədilə ekskavatorun içərisinə yerləşiblər.
Lakin bir qədər sonra çaya sel gəlib və güclü axının təsirindən ekskavator aşıb.
Hadisə nəticəsində ekskavatorun içində olan 4 nəfərdən biri hadisə yerindəcə həyatını itirib. Digər 3 nəfər müxtəlif dərəcəli bədən xəsarətləri alaraq, çətin vəziyyətdə texnikanın içində köməksiz qalıb.
Əraziyə dərhal Fövqəladə Hallar Nazirliyinin xilasediciləri cəlb olunublar. Yaralılar ekskavatorun içindən çıxarılaraq Şamaxı Rayon Mərkəzi Xəstəxanasına təxliyə ediliblər.
Hazırda hadisənin hansı şəraitdə və necə baş verdiyi araşdırılır. Faktla bağlı aidiyyəti qurumlar tərəfindən təhqiqat aparılır.
***
“Qafqazinfo”nun məlumatına görə, hadisə nəticəsində həlak olan və yaralanan şəxslərin adları müəyyənləşib.
1982-ci il təvəllüdlü Ayətullayev Pərviz Qəni oğlu hadisədə həyatını itirib. Eskalatordan sağ çıxarılan şəxslər 33 yaşlı Qazax rayonunun Yuxarı Salahlı kənd sakini Abdullayev Bəxtiyar Nəsib oğlu, 43 yaşlı Cəbrayıl rayonunun Niyazi Qullar kənd sakini Salahov Elnur Məhəmməd oğlu və 37 yaşlı Gədəbəy rayonunun Çiçəkli kənd sakini Qasımov Bəxtiyar Fazil oğludur.
