Xüsusilə ABŞ-ın Texas və Nyu-Meksiko ştatlarında təsirli olan qızılca xəstəliyinin son həftələrdə artaraq 12 ştata yayıldığı, ölkə daxilində aşkar edilən ümumi yoluxma sayının 222-yə çatdığı bildirilib.
Avropa.info xəbər verir ki, ABŞ Xəstəliklərə Nəzarət və Qarşısının Alınması Mərkəzləri (CDC) ölkədə qızılca epidemiyası ilə bağlı açıqlama verib.
CDC-nin rəsmi saytında edilən açıqlamada, ölkə daxilində əksəriyyəti uşaq olmaqla cəmi 222 hadisənin aşkar edildiyi, qızılcaya Texas və Nyu Meksiko ştatlarında, həmçinin Alyaska, Kaliforniya, Florida, Corciya, Kentukki, Nyu Cersi, Nyu York, Pensilvaniya, Rhode Island və Vaşinqtonda da rast gəlindiyi qeyd edilib.
Martın 7-nə olan məlumata görə, Texas 198 qızılca hadisəsi ilə 12 ştata liderlik edir, Nyu Meksiko isə 10 nəfərlə ikincidir.
Açıqlamada Texasda bir uşaq və Nyu Meksikoda bir yetkin qızılcadan öldüyü qeyd edilərək, epidemiyanın yayılmağa davam etdiyi və yaxın günlərdə yoluxma sayının arta biləcəyi xəbərdarlığı edilib.
Açıqlamada ölkədə yaz-yay səyahət mövsümünün yaxınlaşdığına diqqət çəkilərək, peyvənd vasitəsilə qızılca xəstəliyinin yayılmasının qarşısının alınmasında səhiyyə işçilərinin oynadığı mühüm rola diqqət çəkilib.
ABŞ Səhiyyə Naziri Robert Kennedi prezident Donald Trampın keçirdiyi kabinet iclasında ölkədə yenidən tüğyan edən qızılca epidemiyası ilə bağlı vəzifəyə gəldikdən sonra ilk açıqlamasını verib. Texasda qızılcaya qarşı peyvənd olunmayan bir uşağın ölümü ilə bağlı suala Kennedi, “Bu, qeyri-adi bir vəziyyət deyil, bizdə hər il qızılca epidemiyası baş verir” dedi. cavabını vermişdi.
2000-ci ildən bu yana ölkədə rast gəlinməyən qızılca xəstəliyindən bir uşağın ölümünü “normal” adlandıran nazir Kennedi epidemiyanı “azaltmağa” çalışdığı üçün tənqid edilib.
